वनमन्त्री चौधरी र पूर्वमन्त्री चौलागाईंबीच भेटवार्ता- कार्यकालको प्रतिवेदन हस्तान्तरण तथा नीतिगत सुधारमा छलफल

काठमाडौँ: वन तथा वातावरण र कृषि तथा पशुपन्छी विकास मन्त्री गिता चौधरी र पूर्वमन्त्री माधवप्रसाद चौलागाईंबीच आज वन मन्त्रालयमा शिष्टाचार भेटवार्ता भएको छ। उक्त अवसरमा पूर्वमन्त्री चौलागाईंले आफ्नो कार्यकालको प्रगति प्रतिवेदन मन्त्री चौधरीलाई हस्तान्तरण गर्नुभयो।

भेटका क्रममा वन क्षेत्रका विद्यमान नीतिगत समस्या, विकास र संरक्षणबीचको सन्तुलन तथा मन्त्रालयका आगामी प्राथमिकताका विषयमा विस्तृत छलफल भएको थियो। पूर्वमन्त्री चौलागाईंले आफ्नो कार्यकालमा मन्त्रालयले डिजिटल प्रणालीको सुदृढीकरण, जलवायु व्यवस्थापन र संस्थागत सुधारमा हासिल गरेका उपलब्धिहरूबारे मन्त्री चौधरीलाई अवगत गराउनुभयो।

मन्त्रालयले पछिल्लो समय प्रविधिको प्रयोगलाई प्राथमिकता दिँदै डिजिटल प्रणालीको आंशिक कार्यान्वयन सुरु गरेको छ। यसका साथै, वन डढेलोको जोखिम न्यूनीकरणका लागि बीमा कार्यक्रमको सुरुवात, राष्ट्रिय बाघ गणनाको तथ्याङ्क विश्लेषण र जैविक विविधता संरक्षणका लागि विभिन्न अनुसन्धान तथा इन्टर्नसिप कार्यक्रमहरू सञ्चालनमा ल्याइएको जानकारी गराइयो।

त्यसैगरी, स्थानीय तहसम्म वन क्षेत्रको नक्सा र सूचना सहज पहुँचमा पुर्‍याउन 'वेब पोर्टल' सञ्चालन गरिएको र जैविक विविधतासम्बन्धी सातौँ राष्ट्रिय प्रतिवेदन अन्तर्राष्ट्रिय निकायमा पेस भइसकेको विषयमा पनि छलफल भएको थियो। राष्ट्रिय निकुञ्ज व्यवस्थापन हस्तान्तरण प्रक्रिया समेत अन्तिम चरणमा पुगेको पूर्वमन्त्री चौलागाईंले उल्लेख गर्नुभयो।

सीमित स्रोत र संरचनागत चुनौतीका बाबजुद नीतिगत सुधार र सेवा प्रवाहमा सकारात्मक प्रयासहरू भएको बताउँदै उहाँले आगामी दिनमा थप प्रभावकारी नतिजा आउने विश्वास व्यक्त गर्नुभयो। जवाफमा मन्त्री चौधरीले वन संरक्षणलाई प्राथमिकतामा राख्दै विकास निर्माणमा देखा परेका नीतिगत गाँठा फुकाउन आफू सक्रिय रहने प्रतिबद्धता व्यक्त गर्नुभयो।