ताइवानमा शक्तिशाली आँधी: विद्यालय र कार्यालय बन्द, हजारौँ विस्थापित

काठमाडौं : शक्तिशाली आँधी ‘चाम्पी’ ताइवानतर्फ अघि बढेपछि शुक्रबार २२ मध्ये २१ वटा सहर तथा जिल्लामा विद्यालय र कार्यालय बन्द गरिएका छन् । आँधीका कारण एक जनाको मृत्यु भएको छ भने दर्जनौँ घाइते भएका छन् ।

ताइवानमा २४ घण्टामै केही क्षेत्रमा २०० मिलिमिटरभन्दा बढी वर्षा भएको छ । सम्भावित जोखिमलाई ध्यानमा राख्दै एक हजारभन्दा बढी मानिसलाई सुरक्षित स्थानमा सारिएको छ ।

आँधीका कारण शुक्रबारका लागि तय गरिएका सबै २६२ आन्तरिक उडान र ६६० भन्दा बढी अन्तर्राष्ट्रिय उडान रद्द गरिएको स्थानीय सञ्चारमाध्यमले जनाएका छन् । रेल तथा नौका सेवा पनि प्रभावित भएका छन् भने केही राजमार्ग बन्द गरिएको छ ।

ताइवानको मौसम विभागले आँधी शनिबार साँझसम्म सक्रिय रहने अनुमान गरेको छ । उत्तरी क्षेत्रमा तीव्र हावाहुरी चल्ने सम्भावना रहेकाले सर्वसाधारणलाई समुद्री तट र पहाडी क्षेत्रमा नजान चेतावनी दिइएको छ ।

आँधी जापानतर्फ अघि बढ्ने अनुमान गरिएको छ । जापानमा पनि सयभन्दा बढी उडान रद्द भएका छन् भने ओकिनावा क्षेत्रमा ३ हजार ६३० घरधुरीमा विद्युत् सेवा अवरुद्ध भएको छ ।

यस वर्ष पूर्वी एसियामा आँधीको गतिविधि बढेको छ । जापानमा यस वर्षको आँधीको सङ्ख्या ३० पुगेको जनाइएको छ । मौसमविद्हरूले प्रशान्त महासागरमा देखिएको शक्तिशाली एल निनोका कारण यस वर्ष थप आँधी विकसित हुन सक्ने बताएका छन् ।