इरान–अमेरिका तनावबीच कच्चा तेलको मूल्य बढ्यो

काठमाडौँ: इरान र अमेरिकाबीचको तनाव कायमै रहनुका साथै होर्मुज जलघाँटी कहिले पुनः सञ्चालनमा आउने भन्ने स्पष्ट नभएपछि अन्तर्राष्ट्रिय बजारमा कच्चा तेलको मूल्य उकालो लागेको छ।

रोयटर्सका अनुसार सोमबार नेपाली समयअनुसार बिहान ६ बजेर ४१ मिनेटसम्म ब्रेन्ट कच्चा तेलको वायदा मूल्य ९१ सेन्ट अर्थात् १.०९ प्रतिशतले वृद्धि भएर प्रतिब्यारेल ८४.४६ अमेरिकी डलर पुगेको छ।

त्यसैगरी, अमेरिकी वेस्ट टेक्सास इन्टरमिडिएट (डब्ल्यूटीआई) कच्चा तेलको मूल्य पनि ६१ सेन्ट अर्थात् ०.७८ प्रतिशतले बढेर प्रतिब्यारेल ७८.७९ अमेरिकी डलर पुगेको छ।

यसअघि गत साता भने ब्रेन्ट र डब्ल्यूटीआई दुवैको मूल्य ७ प्रतिशतभन्दा बढीले घटेको थियो। इरान र ओमानबीच चाँडै सम्झौता हुने तथा त्यसपछि होर्मुज जलघाँटी पुनः खुल्ने अपेक्षाले बजारमा आपूर्ति सहज हुने विश्वास बढ्दा तेलको मूल्यमा गिरावट आएको थियो।

युद्धअघि विश्वको कुल तेल आपूर्तिको करिब पाँचौँ हिस्सा होर्मुज जलमार्ग हुँदै हुने गरेको थियो। यही कारण उक्त रणनीतिक जलघाँटी लामो समय बन्द रहेमा विश्वव्यापी तेल आपूर्तिमा प्रतिकूल असर पर्न सक्ने आशंका गरिएको छ।

तेहरानले ओमानसँगको सम्झौता अन्तिम चरणमा पुगेको दाबी गरेको छ। यद्यपि, सम्झौता अघि बढाउन अमेरिकाले अझै केही सर्त पूरा गर्नुपर्ने इरानको भनाइ छ। यसै कारण होर्मुज जलघाँटी पुनः खुल्ने विषयमा अन्योल कायम रहँदा अन्तर्राष्ट्रिय तेल बजारमा पनि अनिश्चितता बढेको छ।