लगानीमैत्री वातावरण बनाउने जिम्मा सरकारले लिन्छ: मुख्यमन्त्री आचार्य

रुपन्देही । लुम्बिनी प्रदेशका मुख्यमन्त्री चेतनाराण आचार्यले लगानीमैत्री वातावरण निर्माण गर्ने जिम्मेवारी सरकारले लिने बताएका छन् ।

आज शनिबार बुटवलमा रुपन्देही उद्योग संघको ४६ औं वार्षिक साधारणसभामा सम्वोधन गर्दै मुख्यमन्त्री आचार्यले लगानीमैत्री वातावरण बनाउन तीन तहकै सरकार प्रतिबद्ध भएर लाग्ने र त्यसको समन्वय प्रदेश सरकारले गर्ने बताएका हुन् ।

‘सरकार एक्लै केही गर्न सक्दैन, निजी क्षेत्रबाट नै विकास र समृद्धिको आधार खोज्ने हो, उद्योगीहरुका समस्या पहिचान गरेर कुनै कानूनी समस्या भए समाधान गरेर जान सकिन्छ, त्यही विषयमा छलफल गर्न म समय दिएर तपाईहरुकोमा आएको हुँ’ उनले भने ।

प्रदेश सरकारले अगाडि बढाएका औद्योगिक क्षेत्रको विकासको लागि योजनाबद्ध काम हुने उनले जनाए । लुम्बिनी प्रदेश सरकारले तराईका केही जिल्लाहरुमा औद्योगिक क्षेत्र बनाउनेगरी निर्णय गरेको र सो निर्णयहरुको कार्यान्वयन गर्नेगरी काम अघि बढ्ने उनको भनाइ थियो ।