इरानसँग अमेरिकाको आज अप्रत्यक्ष वार्ता हुने ट्रम्पको दाबी

काठमाडौँ: अमेरिकी राष्ट्रपति डोनाल्ड ट्रम्पले आवश्यकता परे अमेरिका फेरि इरानमाथि सैन्य आक्रमण गर्न सक्ने चेतावनी दिएका छन् । तर, आफू सैन्य कारबाहीभन्दा वार्तामार्फत समाधान खोज्न चाहेको उनले बताएका छन् ।

राष्ट्रपति ट्रम्पले राष्ट्रपतिको विशेष विमानमा सञ्चारकर्मीसँग कुरा गर्दै आवश्यक पर्दा जुनसुकै बेला कारबाही गर्न सकिने भए पनि आफू मानिसको ज्यान जाने अवस्था सिर्जना गर्न नचाहेको बताए । उनका अनुसार सम्झौता भए धेरैको ज्यान जोगिन सक्नेछ ।

उनले आजदेखि अमेरिका र इरानबीच मध्यस्थकर्तामार्फत अप्रत्यक्ष वार्ता सुरु हुने जानकारी पनि दिएका छन् । वार्तामा होर्मुज जलडमरु र इरानको आणविक कार्यक्रमलगायतका विषयमा छलफल हुने जनाइएको छ । यद्यपि, वार्ता कहाँ र कसको सहभागितामा हुने भन्ने खुलाइएको छैन ।

ट्रम्पले साउदी अरेबिया, कतार र संयुक्त अरब इमिरेट्सको अनुरोधपछि इरानमाथि प्रस्तावित नयाँ आक्रमण स्थगित गरिएको पनि बताएका छन् । उनका अनुसार अमेरिकी सेना दोस्रो विश्वयुद्धयताकै सबैभन्दा ठूलो आक्रमणको तयारीमा रहे पनि अन्तिम समयमा कूटनीतिक प्रयासलाई अवसर दिने निर्णय गरिएको हो ।