दिल्ली विस्फोट: ८ जनाको मृत्यु, २४ जना घाइते

काठमाडौँ, २५ कार्त्तिक । भारतको दिल्लीको लाल किल्ला नजिकै कारमा भएको ठूलो विस्फोटमा परेर अहिलेसम्म आठ जनाको मृत्यु भएको छ ।

भारतीय मिडियाहरुले विस्फोटमा ८ जनाको मृत्यु भएको र २४ जना घाइते भएको उल्लेख गरेका छन् । विस्फोटको कारण स्पष्ट छैन, तर दिल्ली, मुम्बई, हरियाणा र उत्तर प्रदेशमा उच्च सतर्कता जारी गरिएको छ ।

यसैबीच, प्रधानमन्त्री मोदीले गृहमन्त्री अमित शाहसँग कुरा गरेको उल्लेख गरिएको छ । प्राप्त जानकारी अनुसार, सोमबार साँझ भारतीय समय अनुसार ६:५५ बजे फोर्ट मेट्रो स्टेशनको गेट नम्बर १ को पार्किङमा पार्किङ गरिएको इको कारमा विस्फोट भएको थियो । आगलागी नजिकै पार्किङ गरिएका अन्य कारहरु पनि जलेको बताइएको छ ।

घटनापछि प्रहरीले क्षेत्रलाई घेरा हालेको छ । फोरेन्सिक टोली आइपुगेको र वरपरको क्षेत्रको सीसीटीभी फुटेज जाँच भइरहेको छ । त्यस्तै घटनास्थलमा एनआईए र एनएसजी कमाण्डोलाई खटाइएको मिडियाहरुले उल्लेख गरेका छन् ।