एमसीसी अन्तर्गत धानखोला-लमहीको ४० किमी सडकको स्तरोन्नति कार्य शुरु

दाङ: एमसीसी अन्तर्गत पूर्व-पश्चिम राजमार्गअन्तर्गत ४० किलोमिटर लामो धानखोला-लमही सडक खण्ड स्तरोन्नति कार्य औपचारिक रूपमा सुरु गरेको छ।
 

सडक स्तरोन्नति तथा मर्मतका लागि नेपालमै पहिलो पटक गुणस्तर, टिकाउपन र दिगोपनालाई ध्यानमा राख्दै अत्याधुनिक निर्माण प्रविधि ‘फुल डेप्थ रिक्लेमेशन’ र ‘सुपरपेभ आस्फाल्ट’ प्रयोग गरिने भएको छ ।
 

यस प्रविधिबाट बलियो तथा टिकाउ सडक निर्माण, पुराना आस्फाल्ट सामग्रीको पुनःप्रयोग तथा वातावरणीय प्रभाव न्यूनीकरण हुने अपेक्षा गरिएको छ। यसले सडक मर्मतमा गरिएको लगानीलाई दीर्घकालसम्म भरपर्दो र लागत प्रभावकारी बनाउने विश्वास लिइएको छ । आयोजनाअन्तर्गत सडकको दुवैतर्फ सात मिटर चौडा क्यारिजवे र साढे दुई मिटर चौडा सोल्जर निर्माण गरी सडकलाई १२ मिटर चौडा बनाइनेछ ।
 

शुभारम्भ समारोहमा लुम्बिनी प्रदेशका मुख्यमन्त्री चेतनारायण आचार्यले आधुनिक प्रविधिको प्रयोगले सडकको गुणस्तर र टिकाउपन सुनिश्चित हुने भन्दै यसको प्रशंसा गरेका छन् । उनले यो सडक खण्ड स्तरोन्नतिले यात्रालाई थप सुरक्षित, सहज र भरपर्दो बनाउने मात्र नभई स्थानीय व्यवसायी, किसान र उद्यमीका लागि नयाँ अवसर सिर्जना गर्ने बताए ।
 

नेपालका लागि संयुक्त राज्य अमेरिकाका कार्यवाहक राजदूत स्कट अर्बमले धानखोला-लमही सडक स्तरोन्नति नेपाल र अमेरिकाबीचको साझेदारीको महत्वपूर्ण उपलब्धि भएको बताए । उनले उच्च गुणस्तरका दिगो पूर्वाधारमा लगानीमार्फत ढुवानी लागत घटाउने, सुरक्षा बढाउने र समुदायलाई बजार तथा अवसरसँग जोड्ने लक्ष्य रहेको उल्लेख गरे ।
 

त्यस्तै भौतिक पूर्वाधार तथा यातायात मन्त्रालयका सहसचिव सुशीलबाबु ढकालले एमसीए-नेपालको लगानी नेपाल सरकारका योजना तथा कार्यक्रमका पूरकका रूपमा रहेको बताए ।
 

एमसीसीका राष्ट्रिय आवासीय उपनिर्देशक सञ्जय पौड्यालले आधुनिक प्रविधिको प्रयोगले दीर्घकालीन कार्यसम्पादन सुनिश्चित गर्ने उल्लेख गरेका थिए ।
 

एमसीए-नेपालका कार्यकारी निर्देशक खड्गबहादुर विष्टले धानखोला–लमही सडक स्तरोन्नति एमसीसी नेपाल कम्प्याक्टअन्तर्गतको सडक मर्मत आयोजनाको महत्वपूर्ण चरण भएको बताए । उनले आयोजना प्रभावकारी, पारदर्शी र उच्च गुणस्तरसहित समयमै सम्पन्न गर्न एमसीए-नेपाल प्रतिबद्ध रहेको पनि बताए । सडक मर्मत आयोजना एमसीसी नेपाल कम्प्याक्टको महत्वपूर्ण हिस्सा हो, जसको उद्देश्य ढुवानी लागत घटाउनुका साथै नेपालको सडक अवस्थालाई सुधार गर्नु रहेको छ ।