नेवार समुदायका परम्परागत मुकुन्डोनाचका लेखक वीणा जोशीलाई मदन पुरस्कार

काठमाण्डौ, २१ भाद्र । यस बर्षको मदन पुरस्कार नेवार समुदायका परम्परागत मुकुन्डोनाचका लेखक वीणा जोशी (राजभण्डारी)ले पाएका छन् ।

मदन पुरस्कार गुठीले २०८२ को मदन पुरस्कारका लागि छनौट भएका १० कृतिबाट जोशीको कृति नेवार समुदायका परम्परागत मुकुन्डोनाचलाई छनौट गरेको हो । गुठीले  'नेवार समुदायका परम्परागत मुकुन्डोनाच ( नेवाः समुदायया परम्परागत ख्वापाः प्याखं)' पुस्तकलाई सामुदायिक अभ्यासमा रहेको नाच परम्पराको सङ्कलन तथा अभिलेखीकरण गरेकाले मदन पुरस्कार २०८२ अर्पण गर्ने निर्णय गरेको जनाएको छ ।

मदन पुरस्कारका लागि छनौट गरिएका १० कृतिमा केशवराज ज्ञवालीको अज्ञात, केशव दाहालको इथा, ललित विष्टको उत्कर्ष, रोशनकुमार झाको नेपालमण्डलसँग जोडिएको सिम्रौनगढको इतिहास, वीणा जोशी (राजभण्डारी) को नेवार समुदायका परम्परागत मुकुन्डोनाच, उमा सुवेदीको परिधि, सीमा आभासको महायुग, श्रवण मुकारुङको सलह, डा. नवराज केसीको स्वस्पर्श र नदीशको हिउँद रहेका थिए ।

त्यस्तै गुठिले यस बर्षको जगदम्बा–श्री पुरस्कार भने ६ दशकदेखि गीत लेखनमा समर्पित किरण खरेललाई प्रदान गरेको छ ।

२०१२ सालमा स्थापित मदन पुरस्कार पहिलोपल्ट वि.सं. २०१३ मा गद्य विधामा सत्यमोहन जोशीको हाम्रो लोक संस्कृति, सामाजिक शास्त्रमा चित्तरञ्जन नेपालीको जनरल भीमसेन थापा र तत्कालीन नेपाल तथा विज्ञान विधामा बलराम जोशीको अधिकविभव स्थिरविद्युत् उत्पादक पुस्तकलाई मदन पुरस्कार अर्पण गरिएको थियो । २०४५ सालमा रानी जगदम्बाको निधनपछि उनको सम्झनास्वरूप जगदम्बा-श्री पुरस्कारको स्थापना गरिएको हो । यो सम्मान पहिलोपटक नारायण गोपाललाई प्रदान गरिएको थियो ।