यस विश्वकप फुटबलदेखि लागु हुदैछन् यी नयाँ नियम

काठमाडौं: फुटबलको खेललाई अझ छिटो र व्यवस्थित बनाउन फिफा विश्वकप २०२६ मा खेलको गति बढाउने र समय खेर फाल्ने प्रवृत्ति रोक्ने नयाँ नियम लागू हुने भएका छन् ।
 

यी नियमहरू यसै वर्ष फेब्रुअरीमा अन्तर्राष्ट्रिय फुटबल संघ बोर्डको १४०औँ वार्षिक बैठकमा पारित भएका थिए र अब विश्वकपदेखि स्वतः लागू हुनेछन् ।
 

नयाँ नियमअनुसार थ्रो–इन र गोल–किकमा ढिलाइ गर्न पाइने छैन । थ्रो–इनका बेला खेलाडीले अनावश्यक समय खेर फालेमा रेफ्रीले पाँच सेकेन्डको उल्टो गणना गर्नेछन् । समयभित्र थ्रो–इन नभएमा निर्णय रद्द गरेर विपक्षी टोलीलाई मौका दिइनेछ । यस्तै, गोल–किकमा पनि ढिलाइ भए पाँच सेकेन्डपछि विपक्षीलाई सिधै कर्नर किक दिने नियम राखिएको छ ।
 

चोट लागेका खेलाडीको उपचारका लागि पनि समय सीमा तोकिएको छ । मैदानमै फिजियोथेरापिस्टबाट उपचार लिएपछि खेलाडी कम्तीमा एक मिनेट मैदान बाहिर बस्नुपर्नेछ ।
 

खेलाडी परिवर्तन (सबस्टीट्युसन) का लागि पनि कडा नियम बनाइएको छ । रेफ्रीले संकेत दिएको १० सेकेन्डभित्र मैदानभित्र आउने र बाहिरिने प्रक्रिया पूरा गर्नुपर्नेछ । यदि १० सेकेन्डभित्र परिवर्तन नभएमा सम्बन्धित टोलीले ६० सेकेन्डसम्म एक खेलाडी कम भएर खेल्नुपर्ने व्यवस्था गरिएको छ ।
 

भिडियो सहायक रेफ्री प्रणालीमा पनि परिवर्तन गरिएको छ । अब गलत तरिकाले दिइएको दोस्रो पहेंलो कार्डबाट भएको रातो कार्डको समीक्षा गर्न सकिनेछ ।
 

यस्तै, ड्रप बल सम्बन्धी नियम पनि संशोधन गरिएको छ । यदि ड्रप बलपछि खेल रोकिएन भने जसको नियन्त्रणमा बल रहन्छ, त्यसै टोलीलाई बलको अधिकार दिइनेछ । यी सबै नियमको उद्देश्य खेललाई छिटो, पारदर्शी र कम समय बर्बाद हुने बनाउनु रहेको फिफाले जनाएको छ ।