बंगलादेशमा हिन्दुमाथि भएको हिंसाप्रति नेपाल सन्त समाजको गम्भीर ध्यानाकर्षण

काठमाडौँ, ७ पुस: छिमेकी राष्ट्र बंगलादेशमा उत्पन्न राजनीतिक अस्थिरताको आडमा अल्पसंख्यक सनातन हिन्दु समुदायमाथि भइरहेको हिंसात्मक आक्रमणप्रति नेपाल सन्त समाजले गम्भीर चिन्ता र घोर भर्त्सना व्यक्त गरेको छ ।

समाजले आज एक विज्ञप्ति जारी गर्दै बंगलादेशमा हिन्दु आस्था भएकै आधारमा व्यक्ति हत्या, मन्दिरमा आक्रमण र सम्पत्तिको विनाश भइरहेको भन्दै यस्ता अमानवीय कार्य तत्काल रोक्न माग गरेको हो ।

हालै बंगलादेशमा हिन्दु युवा दीपुचन्द्र दासको अमानवीय र क्रूर ढंगले हत्या भएको छ । यसका साथै हिन्दुहरूका मन्दिरमा आक्रमण, निजी घर र व्यवसायमा आगजनी, महिलामाथि हिंसा, जबरजस्ती धर्म परिवर्तनको दबाब र निर्दोष नागरिकहरूको हत्याजस्ता घटनाहरू बढिरहेको समाजले जनाएको छ ।

"कुनै पनि समुदायका मानिसहरू प्रति हुने यस्ता अमानवीय र असभ्य व्यवहारहरू कुनै पनि हालतमा स्वीकार्य हुँदैनन्," विज्ञप्तिमा भनिएको छ, "सनातन आस्थाका अनुयायीहरूमाथि भइरहेको अत्याचार कुनै एक समुदायमाथिको मात्र नभई सम्पूर्ण मानवता र नैतिकतामाथिको आक्रमण हो ।"

नेपाल सन्त समाजले बंगलादेश सरकारसँग त्यहाँका अल्पसंख्यक हिन्दु समुदायको जीवन, धार्मिक आस्था र सम्पत्तिको सुरक्षा सुनिश्चित गर्न र दोषीहरूमाथि तत्काल कानुनी कारबाही गर्न जोडदार माग गरेको छ ।

साथै, समाजले नेपाल सरकारलाई पनि यस संवेदनशील विषयमा आफ्नो स्पष्ट धारणा सार्वजनिक गर्न र बंगलादेशमा रहेका हिन्दुहरूको सुरक्षाका लागि आवश्यक कूटनीतिक पहल गर्न आग्रह गरेको छ । अन्तर्राष्ट्रिय समुदाय र मानवअधिकारवादी संस्थाहरूलाई समेत यस्ता मानवअधिकार विरोधी गतिविधि रोक्न प्रभावकारी हस्तक्षेप गर्न विज्ञप्ति मार्फत अपिल गरिएको छ ।

समाजका अध्यक्ष स्वामी ज्ञानानन्द सरस्वती र महासचिव आचार्य गुरुप्रसाद सुवेदीद्वारा हस्ताक्षरित उक्त विज्ञप्तिमा 'वसुधैव कुटुम्बकम्' र सहअस्तित्वको भावना विपरीत भइरहेका यस्ता हिंसात्मक कार्य रोक्नु राज्यको प्रमुख दायित्व भएको स्मरण गराइएको छ ।