गृहमन्त्रीलाई हर्कले सोधे–फेवाताल किनारको २० रोपनी जग्गाको खास कुरा के हो ?

श्रम संस्कृति पार्टीका अध्यक्ष एवं सांसद हर्क साम्पाङले पोखराको फेवाताल क्षेत्रमा रहेको भनिएको २० रोपनी जग्गाका विषयमा सार्वजनिक स्पष्टीकरण दिन गृहमन्त्री सुदन गुरुङसँग माग गरेका छन् । 

सामाजिक सञ्जालमार्फत गृहमन्त्रीलाई सम्बोधन गर्दै साम्पाङले उक्त जग्गा प्रकरणबारे पत्रकार सम्मेलन गरेर सत्यतथ्य बाहिर ल्याउन आग्रह गरेका हुन् ।

उनले यो प्रश्न व्यक्तिगत नभई जनताको प्रतिनिधि र प्रतिपक्षी दलको हैसियतले सोधेको स्पष्ट पारेका छन् । साम्पाङले पोखराको जग्गा विवादले गृहमन्त्रीको नैतिकतामाथि प्रश्न उठाएको भन्दै यसबारे मौन बसे जनताको विश्वास गुम्ने र प्रहरी प्रशासनले समेत नटेर्ने चेतावनी दिएका छन् ।

यसका साथै, साम्पाङले सरकारका सामु दुईवटा मुख्य कार्यभार रहेको उल्लेख गरेका छन् । उनले भदौ २४ गतेको जेन्जी (Gen-Z) आन्दोलनका क्रममा भएको घटनाको निष्पक्ष छानबिन हुनुपर्ने र सहकारी ठगी प्रकरणका फरार अभियुक्त जीबी राईलाई पक्राउ गरी रवि लामिछानेलाई न्याय दिनुपर्ने माग दोहोर्‍याएका छन् ।

गृहमन्त्रीलाई 'भाइ' र 'साथी' को साइनोले सम्बोधन गर्दै साम्पाङले लेखेका छन्, "तपाईंले गलत काम गर्नेहरूको सूची बनाएर कारबाही थाल्नुभएकोमा धन्यवाद छ, तर जग्गा प्रकरण र सदनमा उठाएका मुद्दाहरू नबिर्सनुहोला । यी विषय सुल्झिएपछि मात्र म तपाईंलाई बधाई दिनेछु ।