सभामुखको मनोनयन दर्तापछि डिपी अर्यालले भने- न्यायसंगत रुपमा काम गर्छु

काठमाण्डौ, २० चैत्र । प्रतिनिधिसभाको सभामुख पदका लागि मनोनयन दर्ता गरेका डोलप्रसाद (डीपी) अर्यालले न्यायसंगत रुपमा काम गर्ने बताएका छन् ।

प्रतिनिधिसभाको सभामुख पदका लागि आज मनोनयन दर्ता गरेपछि पत्रकारहरुसँग प्रतिक्रिया दिंदै अर्यालले राष्ट्र र जनताको हितमा नेपालको संविधान, कानुन अनुसार न्यायसंगत काम गर्ने बताएका हुन् ।

अर्यालले सभापति रवि लामिछानेको प्रस्ताव र  कानुनमन्त्री समेत रहेकी सोविता गौतम, अर्थमन्त्री स्वर्णिम वाग्ले र भौतिक पूर्वाधारमन्त्री सुनिल लम्सालको समर्थनमा मनोनयन दर्ता गराएका छन् ।  

संसद सचिवालयको निर्वाचन कार्यतालिका अनुसार आज २ बजेसम्म मनोनयन दर्ताको समय रहेको छ भने साढे २ बजे उम्मेदवारको नाम प्रकाशित हुने छ । त्यस्तै सभामुखको निर्वाचनका आइतबार बस्ने प्रतिनिधि सभमा हुने छ ।

प्रतिनिधि सभामा रास्वपाको स्पष्ट बहुमत रहेकाले अर्याल सभामुख बन्ने निश्चित रहेको छ ।