मोरङ २ मा डा. मिनेन्द्र रिजाललाई चुनावी चटारो, समुन्नत र सुशासनयुक्त नेपाल निर्माणको प्रतिबद्धता

काठमाण्डौ, ११ फाल्गुण । फागुन २१ गते हुने प्रतिनिधिसभा सदस्य निर्वाचनका लागि मोरङ क्षेत्र नम्बर २ बाट नेपाली कांग्रेसका उम्मेदवार डा.मिनेन्द्र रिजालले आफ्नो भिजन प्रस्तुत गरेका छन् ।

डा. रिजालले जनतालाई सम्मानित जीवन, सपना देख्न सक्ने अवसर, रोजगारी र सम्पत्ति सिर्जना, पेटभरी खाने व्यवस्था जस्ता प्राथमिकताहरू सुनिश्चित गर्ने लक्ष्य राखेका छन् ।

किसानलाई चिनाउने र प्रोत्साहन दिने नेपाल, बेथिति र हैरानीबाट मुक्त, विधिसम्मत शासनको नेपाल, छोराछोरी पढाउन आर्थिक भार नपर्ने व्यवस्था, मौलिकतामा गर्व गर्ने, आधुनिक र ओखती–ओत दिने नेपाल, विश्वले सम्मान गर्ने स्वाभिमानी र समुन्नत राष्ट्र उनले आफ्नो भिजनमा समेटेका छन् ।

डा.रिजालले आगामी निर्वाचनमा मोरङ–२ का नागरिकहरूलाई जनताको समर्थनसहित विजयी बन्ने आकांक्षा व्यक्त गर्दै समुन्नत र सुशासनयुक्त नेपाल निर्माणको प्रतिबद्धता जनाएका छन् ।

रिजालले पछिल्लो समय चुनावी अभियानलाई तिब्रता दिंदै अन्य दलका कार्यकर्ताहरुलाई कांग्रेसमा भित्र्याइपनि रहेका छन् । मतदाताको आवाज सुन्ने, साथ दिने प्रतिबद्धता व्यक्त गर्ने र समस्या समाधानका लागि व्यवहारिक सुझाव संकलन पनि गरिएका छन् ।

२०७४ सालको प्रतिनिधिसभा निर्वाचनमा यही क्षेत्रबाट निर्वाचित भएका डा.रिजाल अनुभवी, जनतामैत्री र उत्तरदायी नेताका रूपमा परिचित छन् ।

त्यसपश्चात २०७९ सालको निर्वाचनमा यही क्षेत्रबाट नेपाली कांग्रेसकी उम्मेदवार सुजता कोइराला प्रतिनिधिसभा चुनावमा सहभागी भएकी थिइन्, जहाँ उनी नेकपा एमालेका उम्मेदवार ऋषिकेश पोखरेलसँग पराजित भएकी थिइन् ।

अघिल्लो निर्वाचनको परिणामलाई आत्मसात गर्दै यसपटक डा.रिजाल जनताको विश्वास जित्ने लक्ष्यका साथ मैदानमा उत्रिएका छन् । आम संचारमाध्यमहरुका उत्तिसारो नदेखिका डा.रिजाल चुपचाप चुनावी अभियान चलाइरहेका हुन् ।