प्रतिनिधिसभा निर्वाचन: समानुपातिकतर्फका ५० प्रतिशत मतपत्र छपाइ सम्पन्न

काठमाडौँ: आगामी फागुन २१ गते हुने प्रतिनिधिसभा सदस्य निर्वाचनका लागि समानुपातिक निर्वाचन प्रणालीतर्फको मतपत्र छपाइ कार्यले तीव्रता पाएको छ । 

मतपत्र छपाइको जिम्मेवारी पाएको जनक शिक्षा सामग्री केन्द्रले हालसम्म कुल लक्ष्यको ५० प्रतिशत काम सम्पन्न भएको जानकारी दिएको छ ।

केन्द्रका अनुसार हालसम्म समानुपातिकतर्फका एक करोड दुई लाख ३० हजार थान मतपत्र छपाइ सकिएको छ । निर्वाचन आयोगले यस विधाका लागि कुल दुई करोड आठ लाख ३० हजार थान मतपत्र छपाइ गर्नुपर्ने कार्यादेश केन्द्रलाई दिएको छ ।

केन्द्रले उपलब्ध गराएको पछिल्लो विवरणअनुसार चौबीसै घण्टा मेसिन सञ्चालन गरेर छपाइ कार्यलाई गति दिइएको छ । पछिल्लो २४ घण्टामा मात्रै १३ लाख १३ हजार थान मतपत्र छापिएको छ । उत्पादित मतपत्रमध्ये १० लाख ९८ हजार २०० थान मतपत्र केन्द्रले निर्वाचन आयोगलाई हस्तान्तरण गरिसकेको छ ।

प्याकिङ र ढुवानी तयारी
छपाइसँगै मतपत्र प्याकिङको काम पनि सँगसँगै अघि बढाइएको छ । पछिल्लो एक दिनमा एक हजार ४३१ बाकस मतपत्र प्याकिङ गरिएको छ । हालसम्म कुल सात हजार ८४१ बाकस मतपत्र प्याक भइसकेको छ भने बाँकी १२ हजार ९८९ बाकस प्याकिङ गर्ने प्रक्रियामा रहेको केन्द्रले जनाएको छ ।

प्रत्यक्षतर्फको छपाइ कहिले ?
पहिलो हुने निर्वाचित हुने (प्रत्यक्ष) निर्वाचन प्रणालीतर्फको मतपत्र छपाइ भने केही ढिला गरी सुरु हुनेछ । उम्मेदवारहरूको मनोनयन दर्ता, दाबी-विरोधको प्रक्रिया र अन्तिम नामावली प्रकाशन भई उम्मेदवारहरूलाई निर्वाचन चिह्न प्रदान गरिसकेपछि मात्र प्रत्यक्षतर्फको मतपत्र छपाइ कार्य सुरु हुने जनक शिक्षा सामग्री केन्द्रले प्रष्ट पारेको छ ।