नेपाली कांग्रेसको राष्ट्रियताको धार धुमिल भएको छ: लोकेश ढकाल

काठमाडौं, २८ पुस: नेपाली कांग्रेसका नेता लोकेश ढकालले मुलुकको सबैभन्दा पुरानो प्रजातान्त्रिक पार्टी नेपाली कांग्रेस विभाजनको संघारमा पुगेको दाबी गर्नुभएको छ। ३०४ औं पृथ्वी जयन्ती तथा राष्ट्रिय एकता दिवसको अवसरमा एक प्रेस नोट जारी गर्दै ढकालले पार्टीका महामन्त्रीद्वय गगन थापा र विश्वप्रकाश शर्माले पार्टी विभाजनको जग खनिरहेको गम्भीर आरोप लगाउनुभएको हो।

नेता ढकालले विशेषगरी महामन्त्री गगन थापालाई 'पार्टी विभाजनका मुख्य मतियार' को संज्ञा दिँदै, राष्ट्र निर्माता पृथ्वीनारायण शाहलाई स्वीकार नगर्ने तत्वहरूले नियोजित रूपमा पार्टी फुटाउन खोजेको बताउनुभयो। भृकुटीमण्डपमा भइरहेका गतिविधिहरूलाई उहाँले 'कांग्रेस विभाजनको साइत' र 'मलामी जाने प्रक्रिया' सँग तुलना गर्नुभएको छ।

प्रेस नोटमा ढकालले नेपाली कांग्रेस आफ्नो मूल सिद्धान्त ‘राष्ट्रियता’ बाट विचलित भएको उल्लेख गर्नुभएको छ। उहाँले भन्नुभएको छ, "नेपाल राष्ट्रको एकीकरण गर्ने पृथ्वीनारायण शाहलाई सम्मान नगर्नु र संविधानको प्रस्तावनामा उहाँको योगदान उल्लेख नगर्नु नेपाली राजनीतिकै ठूलो भूल र बेइमानी थियो। कांग्रेसले यस ऐतिहासिक गल्तीलाई सच्याउनुपर्छ।"

उनले तत्कालीन समयमा कांग्रेसकै नेतृत्वमा रहेका सरकारहरूले पृथ्वी जयन्तीको बिदा कटौती गरेको र राष्ट्र निर्मातालाई अपमान गरेको घटनालाई 'खेदजनक' भन्नुभएको छ।

नेता ढकालले अब नेपाली कांग्रेसले आफ्नो नीतिमा पुनरावलोकन गर्नुपर्ने समय आएको बताउँदै राजसंस्थाको पुनर्वहाली र हिन्दू राष्ट्रको एजेण्डा अघि सार्नुभएको छ। "बीपी कोइरालाले स्थापना गरेको पार्टीले धर्मनिरपेक्षता र गणतन्त्र अंगालेकै कारण संकट आएको हो," ढकालले भन्नुभएको छ, "अब कांग्रेस राजसंस्थाको पुनर्वहाली र बौद्ध, बोन, किराँतसहितको सनातन हिन्दू राष्ट्रको पक्षमा उभिनुपर्छ।"

ढकालले पार्टी संस्थापन पक्ष (देउवा समूह) को पनि विगतमा कडा आलोचना गर्दै आएको स्मरण गराउँदै अहिलेको परिस्थितिमा विदेशी शक्ति र पैसाको आडमा कांग्रेसलाई विभाजित गर्न खोज्नेहरू देशका लागि घातक भएको बताउनुभएको छ। उहाँले पूर्वराजा ज्ञानेन्द्र शाहले पृथ्वी जयन्तीको पूर्वसन्ध्यामा जारी गरेको सन्देशको सारलाई आत्मसात गर्दै सबै राजनीतिक शक्तिहरूबीच नयाँ सहमति निर्माण गर्नुपर्नेमा जोड दिनुभएको छ।

विभाजित कांग्रेसले देशको राजनीतिक संकट समाधान गर्न नसक्ने उल्लेख गर्दै ढकालले सम्भावित विभाजन रोकेर राष्ट्र बचाउने भूमिका खेल्न आम कांग्रेस कार्यकर्तालाई आह्वान समेत गर्नुभएको छ।