शान्ति र स्थायित्व नै समृद्धिको आधार: डिपि अर्याल

राष्ट्रिय स्वतन्त्र पार्टी (रास्वपा) का नेता डिपि अर्यालले मुलुकको सर्वाङ्गीण विकास र आर्थिक समृद्धिका लागि शान्ति र राजनीतिक स्थायित्व अनिवार्य सर्त रहेको बताएका छन् । नेपाल उद्योग वाणिज्य महासंघद्वारा आयोजित 'शान्ति, स्थायित्व र समृद्धिका लागि सहकार्य' विषयक बहस कार्यक्रममा बोल्दै उनले यस्तो धारणा राखेका हुन् ।

नेता अर्यालले २१औँ शताब्दीको तीव्र विकास र प्रविधिको युगमा पनि नेपाल अझै शान्ति र स्थिरताकै लागि बहस गर्नुपर्ने अवस्थामा रहनु दुःखद भएको टिप्पणी गरे । उनले २०७२ को संविधान जारी भएको १० वर्ष पुग्दा पनि आम नागरिक र विशेष गरी युवा पुस्ता (जेन्जी) सुशासन र रोजगारीका लागि सडकमा आउनुको कारणबारे राजनीतिक नेतृत्वले गम्भीर आत्मसमीक्षा गर्नुपर्ने बताए ।

"शान्ति बिना समृद्धि सम्भव छैन र समृद्धि बिना शान्ति स्थायी रहन सक्दैन," अर्यालले भने, "पछिल्लो समयका आन्दोलन र अस्थिरताका कारण निजी क्षेत्रले करिब ८० अर्ब रुपैयाँ बराबरको ठूलो भौतिक र आर्थिक क्षति व्यहोर्नु परेको छ, जुन निकै निराशाजनक पक्ष हो ।"

नेपालको निजी क्षेत्रले कुल रोजगारीको ८५ प्रतिशत हिस्सा ओगटेको र करिब ५५ लाख मानिसलाई जीविकोपार्जनको आधार दिएको तथ्य प्रस्तुत गर्दै उनले राज्यले निजी क्षेत्रलाई जगका रूपमा स्विकार्नुपर्ने बताए । उनले पर्यटन, कृषि, ऊर्जा र सूचना प्रविधि जस्ता क्षेत्रमा लगानी आकर्षित गर्न नीतिगत स्थिरता, प्रशासनिक सहजता र भ्रष्टाचारमुक्त वातावरण बनाउनु साझा उत्तरदायित्व भएको उल्लेख गरे ।

अन्त्यमा, नेता अर्यालले डिजिटल अर्थतन्त्र र युवा उन्मुख व्यवसायलाई प्रोत्साहन गर्दै नेपालमै अवसर सिर्जना गर्न राज्य, निजी क्षेत्र र नागरिक समाज एकै ठाउँमा उभिनुपर्नेमा जोड दिए । उनले समृद्धि केवल शब्दमा मात्र नभई व्यवहारमा उतार्न सबै पक्षबीच प्रभावकारी समन्वय र सहकार्य आवश्यक रहेको बताए ।