कलममसीलाई धार्मिक पर्यटनको गन्तब्य बनाउन सरकार तयार छ : मन्त्री सिंह

भक्तपुर : उपप्रधानमन्त्री एवम् शहरी विकासमन्त्री प्रकाशमान सिंहले नगरकोट नजिकको कलममसी धार्मिक पर्यटनका लागि आकर्षक गन्तव्य बन्न सक्ने बताएका छन् ।

मंगलबार चाँगुनारायण नगरपालिकाको कलममसीमा शुरु भएको शिवपुराण महायज्ञ उदघाटन समारोहमा सम्बोधन गर्दै उनले  कलममसी क्षेत्र धार्मिक पर्यटकका लागि आकर्षक गन्तव्य बन्नसक्ने बताएका हुन् ।

अहिले नगरकोट भ्रमण वर्ष प्रारम्भ भएको भन्दै महायज्ञले धार्मिक पर्यटनलाई प्रोत्साहित गर्न योगदान पुग्ने विश्वास पनि सिंहले व्यक्त गरे ।

१ सय ८ फिटको शिवजीको प्रतिमा बनाउने लक्ष्यका साथ कलममसीमा आजबाट शिवपुराण महायज्ञ शुरु भएको छ । करिब ७ वर्षअगाडि आफैले शिलान्यास गरेको सो स्थानमा भइरहेको महायज्ञमा सहभागि हुन पाउँदा खुशी व्यक्त गर्दै सिंहले लक्ष्यअनसार काम सम्पन्न गर्न आफूले सकेको सहयोग गर्ने पनि बताए ।

‘यो ठाउँ पनि ऐतिहासिक छ । अत्यन्त राम्रो स्थान पनि भएकाले ज्ञान प्राप्त गर्न र ध्यानका लागि उचित थलो हो,’उनले भने,‘१०८ फिटको शिवजीको प्रतिमा त बन्छ नै । काठमाडौंमा आउने पर्यटकलाई मन भुलाउन सक्ने । ध्यान गर्न सक्ने थलोका रूपमा यसलाई विकसित गर्नुपर्छ । तीनै तहको सरकार र भक्तजन मिलेर यो कार्यलाई फत्ते गर्न लाग्नुपर्छ ।’

उनले काठमाडौं आउने पर्यटकका लागि ध्यान गर्नका लागि कलममसीमा बन्दै गरेको मन्दिर र पार्क राम्रो गन्तव्य बन्नसक्ने बताए । मंगलबारबाट शुरु भएको शिव पुराण ज्ञान महायज्ञ १३ दिनसम्म चल्नेछ ।