माओवादी प्रत्यक्ष निर्वाचित कार्यकारी प्रमुख र समानुपातिकको पक्षमा

पोखरा: नेकपा माओवादी केन्द्रका अध्यक्ष पुष्पकमल दाहालले जनताबाट प्रत्यक्ष निर्वाचित कार्यकारी प्रमुखले मात्र राजनीतिक स्थायित्व र भ्रष्टाचारको अन्त्य गर्न सक्ने बताएका छन् । 

शुक्रबार पोखरामा आयोजित तमु राष्ट्रिय मुक्ति मोर्चा नेपालको राष्ट्रिय भेलाको उद्घाटन गर्दै उनले आफ्नो पार्टी प्रत्यक्ष निर्वाचित कार्यकारी प्रमुख र समानुपातिक निर्वाचन प्रणालीको पक्षमा रहेको भन्दै यसले मात्र राजनीतिक स्थिरता र सुशासन कायम गर्न सक्ने बताए । 

उनले भने, ‘संविधान निर्माणको बेला नै हामीले केही ‘रिजर्भेसन’ राखेका छौँ । संविधान संशोधन नै गर्ने हो भने हामी तयार छौँ । तर, कसका लागि, कसको पक्षमा ? यो महत्वपूर्ण प्रश्न हो । हामी प्रत्यक्ष निर्वाचित कार्यकारी प्रमुख र समानुपातिक निर्वाचन प्रणालीको पक्षमा छौँ । यसले मात्र राजनीतिक स्थिरता र सुशासन कायम गर्न सक्छ ।’

यस्तै, उनले २०८४ को निर्वाचनमा एक्लै जनता सामु जाने भन्दै कांग्रेस र एमालेबीच गठबन्धन गर्न चुनौती दिएका छन् । 

उनले भने, ‘अहिले कांग्रेस र एमालेको गठबन्धन छ । उपनिर्वाचनमा पनि कांग्रेस–एमालेबीच गठबन्धन गरियो । उनीहरू २०८४ मा गठबन्धन गर्न चाहेका छन् । म चाहन्छु– उनीहरू मिलून् । हामी एक्लै जनतामा जान्छौँ । हामी जनताको तागतमा विश्वास गर्छौँ । जनतालाई मेरो अपील छ– तपाईहरू एकतावद्ध हुनुस्, आफ्नो तागत देखाउनुस् ।’

उनले हामीले उत्पीडित वर्ग, जाति र समुदायको पक्षमा संघर्ष गर्दै आएको भन्दै अब फेरि वर्गतिर फर्किएर आन्दोलनको उठान गर्ने बताए ।