भारत विश्वको तेस्रो ठूलो अर्थतन्त्र बन्ने दौडमा

नयाँदिल्ली । गोल्डम्यान स्याक्सको अध्ययनले  सन् २०७५ सम्ममा भारत पाँच सय २५ खर्ब अमेरिकी डलरका साथ विश्वको दोस्रो सबैभन्दा ठूलो अर्थव्यवस्था हुने कुरा भारतीय विदेशमन्त्री सुब्रमण्यम जयशंकरले जनाएको बताएका छन् ।

उक्त अध्ययनले सन् २०३० सम्ममा भारत विश्वको तेस्रो ठूलो अर्थतन्त्र बन्ने अनुमान गरेको पनि उनले बताए । द इन्डिया सेन्चुरी भन्ने विषयवस्तुको बारेमा बोल्दै उनले भने, 'एक दशकअघि विश्वको दशौँ ठूलो अर्थतन्त्र भएको भारत अहिले पाँचौँ स्थानमा छ । दशकको अन्त्यसम्ममा तेस्रो हुने सम्भावना छ ।' जयशङ्करले भारतको प्रतिभा र सीपबारे प्रकाश पार्दै यो करिब दिन प्रतिदिन बढिरहेको बताए । उनका अनुसार युरोप र उत्तर अमेरिकाले भारतबाट प्रतिभा र सीपको सहज प्रवाह चाहन्छन् ।

उनले भने - 'मलाई लाग्छ कि त्यहाँ अन्य तरिकाहरू छन्, जुन अझ प्रभावकारी हुन सक्छ । यदि प्रविधि, एआई र सेमीकन्डक्टरहरूमा ठूला बहसहरू हेर्नुहुन्छ भने भारतीय प्रतिभा र सीपको महत्त्व दिनप्रतिदिन बढ्दै गएको छ ।'

विश्वको सबैभन्दा धेरै जनसंख्या र त्यो जनसँख्याले निर्धारण गरेको बजार, प्रशस्त सामुन्द्रिक पहुँच र सस्तो श्रम शक्ति आदिका कारणहरुले गर्दा आर्थिक रुपमा तिव्रतर छलाङ मारिरहेको देश हो भारत । अझ पछिल्लो समय भारत थप लगानी मैत्री बन्दै गएको मूलुक हो । विश्वका ठुला ठुला कम्पनी र कर्पोरेट घरानाहरु त्यहाँ लगानी गर्न लालायित छन् ।