सुपर खुदी हाइड्रोको आइपिओको बाँडफाँड आज हुँदै

काठमाण्डौ, १७ फाल्गुण । सुपर खुदी हाइड्रोपावर लिमिटेडको आइपिओको बाँडफाँड आज हुने भएको छ ।

कम्पनीको शेयर निष्काशन तथा बिक्री प्रबन्धक ग्लोबल आइएमई क्यापिटल लिमिटेडका अनुसार आज बिहान साढे ८ बजे आइपिओ बाँडफाँड हुने भएको हो ।

कम्पनीले फागुन ५ गतेदेखि ११ गते सम्म खोलेको आवेदनमा २७ लाख ६ हजार ८७९ जना लगानीकर्ताले तीन अर्ब एक करोड ३७ लाख १२ हजार रुपैयाँ बराबरको तीन करोड एक लाख ३७ हजार १२० कित्ता शेयरको लागि आवेदन दिएका छन् ।

कम्पनीले १२ करोड ८६ लाख ५० हजार रुपैयाँबराबरको प्रतिशेयर १०० रुपैयाँ अंकित मूल्यका १२ लाख ८६ हजार ५०० कित्ता साधारण शेयर निष्काशन गरेको थियो । यो आइपिओ एक लाख २८ हजार ६५० लगानीकर्तालाई १०-१० कित्ताका दरले पर्ने छ भने बाँकीको हात खाली हुने छ ।