एमसिसी प्रसारणलाइनको 'राइट अफ वे'मा संरचना निर्माण र रुख रोप्न सरकारको रोक

अमेरिकी सहयोग नियोग– एमसिसीको अनुदान र नेपाल सरकारको लगानीमा निर्माण हुन लागेको विद्युत प्रसारणलाइन क्षेत्रमा अब कुनै पनि भौतिक संरचना बनाउन नपाइने भएको छ।

सरकारले बिहीबार राजपत्रमा सूचना प्रकाशित गर्दै प्रसारणलाइनको मध्यभागबाट दायाँ २३ मिटर र बायाँ २३ मिटर गरी कुल ४६ मिटर क्षेत्रभित्र संरचना निर्माण र रुख रोप्न निषेध गरेको हो।

३ सय १५ किलोमिटर लामो यो ४ सय केभी प्रसारणलाइन नेपालका १० वटा जिल्ला भएर बन्नेछ। राजपत्रमा उल्लेख भएअनुसार– काठमाडौं, सिन्धुपाल्चोक, नुवाकोट, धादिङ, मकवानपुर, चितवन, तनहुँ, पाल्पा, नवलपरासी पूर्व र नवलपरासी पश्चिमका प्रभावित क्षेत्रमा यो नियम लागू हुनेछ।

करिब १ हजार ३ सय ८१ हेक्टर क्षेत्रफलमा फैलिने यो प्रसारणलाइनको सुरक्षा र प्राविधिक संवेदनशीलतालाई ध्यानमा राख्दै मन्त्रिपरिषद्को निर्णयअनुसार यो रोक लगाइएको हो। एमसिए–नेपालले हाल प्रसारणलाइनसँगै तीनवटा अत्याधुनिक सबस्टेसन निर्माणको कामलाई समेत तीव्रता दिएको छ।