जेन–जी आन्दोलनको क्षति: बीमा कम्पनीहरूद्वारा साढे ५ अर्ब दाबी भुक्तानी

काठमाडौं: जेन–जी आन्दोलनका क्रममा भएको भौतिक क्षतिको दाबी वापत निर्जीवन बीमा कम्पनीहरूले हालसम्म ५ अर्ब ४८ करोड २५ लाख रुपैयाँ भुक्तानी गरेका छन्। नेपाल बीमा प्राधिकरणका अनुसार कूल ३ हजार ३१६ वटा बीमा दाबी मार्फत करिब २३ अर्ब ४७ करोड रुपैयाँको माग परेको थियो।

प्राधिकरणका अनुसार १४ वटा निर्जीवन र ४ वटा लघु निर्जीवन बीमा कम्पनीहरूबाट प्राप्त तथ्याङ्कले भुक्तानी भएको कूल रकममध्ये सम्पत्ति बीमातर्फ सबैभन्दा धेरै हिस्सा देखाउँछ। सम्पत्ति बीमातर्फ परेको १९ अर्ब ५ करोडको दाबीमध्ये ३ अर्ब ९३ करोड ५९ लाख र मोटर बीमातर्फ ३ अर्ब ४६ करोडमध्ये १ अर्ब ३९ करोड २५ लाख रुपैयाँ भुक्तानी भएको छ।

यसैगरी, इञ्जिनीयरिङ तथा ठेक्का जोखिम बीमातर्फ ८ करोड ३६ लाख, परिवहन बीमातर्फ १ करोड ५५ लाख र अन्य बीमा शीर्षकमा ५ करोड रुपैयाँ दाबी भुक्तानी गरिएको छ। यी रकमहरूमा बीमितलाई दिइएको अग्रिम भुक्तानी समेत समावेश छ।

आन्दोलनको क्षति व्यवस्थापनका लागि नेपाल पुनर्बीमा कम्पनीले पनि निर्जीवन बीमा कम्पनीहरूलाई ३ अर्ब २ करोड रुपैयाँ अग्रिम भुक्तानी गरेको छ। पुनर्बीमा कम्पनीमा विभिन्न १४ वटा कम्पनीहरूबाट १६ अर्ब ६२ करोड ६६ लाख रुपैयाँ बराबरका २ हजार ८६३ वटा पुनर्बीमा दाबी परेका छन्।