कालोसूचीका प्रावधानमा रिभ्यु गर्दैछौँ, भ्रष्टाचार भएको भए क्षम्य हुँदैन: गभर्नर विश्वनाथ पौडेल

काठमाडौं: नेपाल राष्ट्र बैंकका गभर्नर डा.विश्वनाथ पौडेलले नेपाल राष्ट्र बैंकले कालोसूचीका प्रावधानमा अध्ययन गरेर रिभ्यु गर्न थालेको बताएका छन्। 

नेपाल आर्थिक पत्रकार संघको वार्षिकोत्सव समारोहलाई सम्बोधन गर्दै मुलुकमा लगानी नबढ्नुको एउटा कारण कालोसूचि समेत भएकाले यसमा रिभ्यु गर्नेगरी प्रक्रिया अघि बढाईएको बताएका छन्। साथै उनले बैंकमा बढेको तरलतालाई घटाउन घटाउन राष्ट्र बैंकले मौद्रिक नीतिलाई लचिलो बनाएको बताएका छन्। यसले आगामी दिनमा लगानी बढ्दै जाने बताए।  

गभर्नर पौडेलले निर्माण क्षेत्रमा समुहमा गरिएको लगानीमा एक जनाले नराम्रो गरे सबै कालोसूचीमा पर्ने समस्यालाई समेत हटाइने बताएका छन्। धितो राखेर ऋणीहरूले ऋणहरू लिने र धितो लिलामी गर्दा कम मूल्यांकन गरेर बेच्ने प्रवृत्तिलाई हटाइने समेत गभर्नर पौडेलले बताए।

गभर्नर पौडेलका अनुसार यो निजी क्षेत्रमा भएको भ्रष्टाचारका रुपमा राष्ट्र बैंकले लिएको छ। सरकारी बैंकबाट ऋण मिलाइदिने भन्दै बार्गेनिङ हुँदा सरकारी निकायहरूले रोक्नसक्ने भएपनि निजी बैंकहरूमा हुने त्यस्ता गतिविधिहरू रोक्न चुनौती रहेको बताए। गभर्नर पौडेलकाअनुसार त्यस्ता गतिविधिलाई राष्ट्र बैंकले गम्भीर रुपमा लिनेछ।