उखु खनजोतका लागि कृषि यन्त्र ल्याइयो

रौतहट  : उखु खनजोतका लागि सहज गर्ने उद्देश्यले बाबा बैजुनाथ सुगर एण्ड केमिकल इण्डष्ट्रीज कटहरियाले कृषि यन्त्र ल्याएको छ । अहिले उखु खेतीका लागि काम गर्ने मजदुरको अभाव भएकाले कृषि यन्त्र उपयोगी मानिएको छ । 

यन्त्रले कम समयमा सहज तरिकाले उखु खनजोत गर्न सकिने कटहरियाका उखु कृषक रामदयाल महतोले बताए । कृषि मजदुरको अभावमा यहाँका धेरै कृषकले खेती नै गर्न छाडिसकेको अवस्थामा यन्त्र भित्र्याएपछि बढने उनले अनुमान गरे ।

‘गाउँघरमा खेतमा काम गर्ने मजदुर पाइदैन,’उनले भने, ‘अब कृषि यन्त्र भएन भने खेतीबाट नै बिस्थापित हुनुपर्ने भइसकेको छ । बजारमा आएका नयाँ कृषि यन्त्रसँगै यहाँका कृषकले यसको प्रयोग पनि गरिरहेको उनले बताए । उनका अनुसार चिनी मिलले ल्याएको यन्त्र उपयोगी हुने र कृषकले अधिक प्रयोग गर्ने अनुमान गरिएको छ ।

उखु कृषकलाई आधुनिक खेतीतर्फ आकर्षित गर्ने उद्देश्यले मिलले ‘पावर विडर’ नामक यो कृषि यन्त्र ल्याएको जनाएको छ ।

उखु महाप्रबन्धक सियाराम साहका अनुसार मुरहन र खुट्टी प्रजातिको उखु गोडमेल गर्न यन्त्रले सहज हुनेछ । यसले खेती गर्दा आएका अनावश्यक झारपात निकाल्छ । उनले भने ‘उखुमा माटो चढाउन पनि सहज हुन्छ ।’

अहिले यन्त्र परीक्षणको रुपमा ल्याएको र सफल भएकाले कृषकलाई चाडैं नै बितरण गर्ने योजना बनाएको उनले जानकारी दिए । यन्त्र मिलले सहुलियत दरमा कृषकलाई उपलब्ध गराउने उखु महाप्रबन्धक साह बताए ।

यहाँ अधिक कृषकलाई उखु खेतीतर्फ आकर्षण गर्ने उद्देश्य लिइएको मिल सञ्चालक बैजु बाबराले बताए । उखु कृषकको भुक्तानीमा समस्या नरहेको उल्लेख गर्दै उनले कृषि प्राविधिक सल्लाहसंगै अनुदानमा विभिन्न सहयोग गर्दै आएको बताए । यस जिल्लामा उखु बिस्तार गर्ने योजनाका साथ मिल प्रशासनले बेला बेलामा कृषि यन्त्र सहुलियतमा दिदै आएको छ । यस्ता किसिमका विभिन्न आधुनिक कृषि उपकरण र औजारको प्रयोगले समय र श्रम दुवै कम हुने अपेक्षा गरिएको छ ।