शैलुङका किसान आलु खेतीमा व्यस्त

काठमाडौं : रामेछापको शैलुङका किसानलाई अहिले भ्याइ–नभ्याई छ । 
शैलुङ क्षेत्रको दोरम्बा, डडुवा, गौश्वारा लगायतका क्षेत्रका किसानहरू यति बेला आलु रोप्न व्यस्त छन् ।  

रामेछापको दोरम्बा शैलुङ गाउँपालिकाको शैलुङ क्षेत्रमा ४० हजार हेक्टर भन्दा बढी जमिनमा आलु खेती हुने गर्दछ । त्यहाँका किसानको मुख्य उत्पादन नै आलु हो । 

 
शैलुङको आलुको माग बजारमा उच्च भएपछि किसानहरू थप व्यावसायिक रूपमा आलु खेतीमा लागेका छन् । परम्परागत बिउको सट्टा डडुवाको खोलाखर्कमा नै नयाँ जातको आलुको बिउ उत्पादन गरी किसानले आलुको उत्पादन बढाएका छन् । 

स्थानीय किसान दावासङ्बु शेर्पाका अनुसार शैलुङका कतिपय किसानले एक सिजनमा ५÷६ लाख रुपैँयासम्मको आलु बिक्री गर्ने गर्दछन् । यहाँको आलु काठमाडौंको कालीमाटी, बल्खु, लगायतको मुख्य तरकारी बजारमा बिक्री हुन्छ । अहिले तराइमा समेत शैलुङको आलुको माग बढेको छ । आलु खरिद गर्न अहिले व्यापारीहरू किसानको घर घरमा पुग्ने भएकोले किसानलाई बिक्रीको चिन्ता छैन । यस वर्ष किसानले आलु प्रतिकिलो ६० रुपैँया किलोसम्ममा बिक्री गरे । जो राम्रो मूल्य हो । 

विगतमा परम्परागत पुरानो आलुको बिउ लगाउँदै आएका किसानले हाल रोजिटा जातको रोग नलाग्ने बिउ प्रयोग गर्न लागेका छन् । मूल बिउ नै शैलुङमा उत्पादन हुने भए पछि यहाँका किसानले आलुको बिउ बिक्रीबाट समेत राम्रो आम्दानी गर्ने गरेका छन् । नयाँ बिउ लगाएपछि आलुको उत्पादन बढेको शेर्पाले बताए । 

डडुवामा नै अब रोजिटा लगायत उन्नत जातका आलुको बिउ समेत उत्पादन सुरु भए पछि किसानहरू खेतीमा थप उत्साहित भएका उनले सुनाए ।