१२ लाखभन्दा बढी विदेशी पर्यटक भित्रिए, भारत अग्रस्थानमा

काठमाडौँ: नेपाल पर्यटन बोर्डले सार्वजनिक गरेको पछिल्लो तथ्याङ्कअनुसार आर्थिक वर्ष २०८२/८३ मा १२ लाखभन्दा बढी विदेशी पर्यटकले नेपाल भ्रमण गरेका छन्। पर्यटन क्षेत्रमा आएको यो सुधारले अर्थतन्त्रमा सकारात्मक सङ्केत देखाएको छ।

अघिल्लो वर्षको तुलनामा पर्यटकीय गतिविधिमा वृद्धि भएपछि बोर्डले अब बसाइ अवधि लम्ब्याउने र उच्च बजेटका पर्यटक भित्र्याउने नयाँ रणनीति तय गरेको छ।

नेपाल भित्रिने पर्यटकमा सबैभन्दा ठूलो हिस्सा छिमेकी मुलुक भारतको रहेको छ। कुल आगमनको करिब २५.७६ प्रतिशत अर्थात् ३ लाख ११ हजार ५३१ पर्यटक भारतबाट मात्रै आएका हुन्।

भारतपछि अमेरिका र चीन क्रमशः दोस्रो र तेस्रो प्रमुख स्रोत बजारका रूपमा स्थापित भएका छन्। गत वर्ष अमेरिकाबाट १ लाख ११ हजार ३२५ पर्यटकले नेपाल भ्रमण गरे भने चिनबाट १ लाख ९ हजार ८९२ पर्यटकले नेपाल भ्रमण गरे।  

यसैगरी बंगलादेशबाट ५८ हजारभन्दा बढी, बेलायतबाट ५६ हजार, अस्ट्रेलियाबाट ५३ हजार, श्रीलंकाबाट ४३ हजार र भुटानबाट ३६ हजारभन्दा बढी पर्यटक नेपाल आएका छन्। म्यानमार, जर्मनी, थाइल्यान्ड, जापान र मलेसियाबाट आउनेको सङ्ख्या पनि २५ हजारभन्दा माथि रहेको छ।

कुन महिनामा भयो धेरै आगमन?
मुख्य पर्यटकीय सिजन मानिने कात्तिक (अक्टोबर/नोभेम्बर) मा सबैभन्दा बढी १ लाख २४ हजार ८२९ जना पर्यटक नेपाल भित्रिए।
चैत: १ लाख १९ हजार+
फागुन: १ लाख १४ हजार+

असोज: १ लाख ११ हजार+
 

साथै, सरकारले सन् २०२७ लाई ‘आरोग्य पर्यटन वर्ष’ का रूपमा मनाउने घोषणा गरिसकेकाले चालु वर्षमा पर्यटक आगमन अझै बढ्ने अपेक्षा गरिएको छ।

बोर्डका अनुसार अब नेपालको पर्यटन रणनीति परिमाण (सङ्ख्या) भन्दा पनि गुणस्तरमा केन्द्रित हुनेछ। धेरै खर्च गर्ने पर्यटक भित्र्याउने, उनीहरूको नेपाल बसाइ अवधि लम्ब्याउने र नयाँ अन्तर्राष्ट्रिय बजारसम्म पहुँच पुर्‍याउने लक्ष्यसहित काम अगाडि बढाइने बोर्डले जारी गरेको विज्ञप्तिमा उल्लेख छ।