जेनजीका शहीद र घाइतेको माग सम्बोधन गर्न सरकार प्रतिबद्ध : मन्त्री गौतम

काठमाडौँ: कानुन, न्याय तथा संसदीय मामिलामन्त्री सोबिता गौतमले जेनजी आन्दोलनका शहीद तथा घाइतेका माग सम्बोधन गर्न सरकार पूर्ण रूपमा प्रतिबद्ध रहेको बताएकी छन्। जेनजी शहीद दिवसका अवसरमा आयोजित कार्यक्रममा उनले वर्तमान सरकारप्रति भरोसा राख्न आग्रह गरिन्।

भदौ २३ गते नागरिकमाथि गोली चलेको स्मरण गर्दै मन्त्री गौतमले अब त्यस्तो नियति कसैले भोग्न नपर्ने बताइन्। जेनजी आन्दोलनका मागबारे सरकारका मन्त्री र सांसदहरूबीच दैनिकजसो छलफल र परामर्श भइरहेको उनको भनाइ छ।

उनले शहीद परिवार, घाइते तथा आन्दोलनसँग जोडिएका सबैलाई एकजुट भएर अघि बढ्न आग्रह गर्दै जेनजीभित्रै विभाजन र दोषारोपण बढे आन्दोलनका विरोधीले फाइदा उठाउने चेतावनी दिइन्।

सरकार गठन भएको करिब पाँच महिना मात्रै भएकाले कानून निर्माणलगायतका काममा केही संवैधानिक चुनौती रहेको उल्लेख गर्दै गौतमले सबै कुरा व्यवस्थित रूपमा अघि बढिरहेको दाबी गरिन्। उनले जेनजीका सपना र माग पूरा गर्न सरकार प्रतिबद्ध रहेको भन्दै सरकारमाथि विश्वास राख्न आग्रह गरिन्।