प्रधानमन्त्रीले चाहेर पनि राहत कोषको पैसा दायाँबायाँ गर्न पाउनुहुन्न : प्रवक्ता खरेल

काठमाडौं: सत्तारुढ राष्ट्रिय स्वतन्त्र पार्टी (रास्वपा) ले प्रधानमन्त्री राहत कोषमा जम्मा भएको रकम कुनै हालतमा दुरुपयोग हुन नसक्ने बताएको छ । प्रधानमन्त्रीले नै चाहे पनि कोषको रकम दायाँबायाँ गर्न नसक्ने रास्वपाका प्रवक्ता जगदीश खरेलले स्पष्ट पारे ।

आज बसेको सचिवालय बैठकपछि पत्रकारसँग कुरा गर्दै उनले राहत कोषमा जम्मा भएको रकम अन्यत्र रकमान्तर गर्न नमिल्ने स्पष्ट पारेका हुन् ।

उनले भने, ‘जुन रूपमा पैसा उठ्यो, यसमा सरकारले मनलाग्दी गर्छ कि भन्ने पनि आशंका होलान् । तर सरकारले, मन्त्रिपरिषद्ले त्यो शीर्षकमा बाहेक ८ अर्ब रुपैयाँ दायाँबायाँ खर्च गर्न पाउनुहुन्न । त्यो रकमान्तर गर्न पनि पाइँदैन । नियममै त्यो कुरा छ । जे प्रयोजनको लागि हो, त्योबाहेक एक पैसा पनि दायाँबायाँ गरेर खर्च गर्न पाइँदैन । प्रधानमन्त्रीले नै चाहेर पनि दायाँबायाँ गर्न सक्नुहुन्न ।’

प्रवक्ता खरेलले रास्वपाले बाढी–पहिरो पीडितका लागि संकलन गरेको राहत सामग्री सिधै वितरण नगरी सरकारी संकलन केन्द्रमार्फत पठाउने जानकारी दिए ।