‘आइतबारको बिदा खारेज हुँदैन’- सस्मित पोखरेल

काठमाडौँ: सरकारले लागू गरेको आइतबारको सार्वजनिक बिदा यथावत् रहने भएको छ। शिक्षा तथा खेलकुदमन्त्री तथा सरकारका प्रवक्ता सस्मित पोखरेलले आइतबारको बिदा खारेज हुने चर्चा निराधार रहेको स्पष्ट पारेका हुन्।

सार्वजनिक बिदा पुनरावलोकन गर्न सरकारले समिति गठन गरेपछि आइतबारको बिदा हटाइने अनुमान सार्वजनिक रूपमा गरिएको थियो। तर, मन्त्री पोखरेलले सरकारले हालका लागि यस्तो कुनै निर्णय नगरेको बताएका छन्।

उनका अनुसार आइतबारको बिदा यथावत् रहनेछ। उनले अन्तर्राष्ट्रिय अभ्यासमा पनि अधिकांश देशमा हप्तामा दुई दिन सार्वजनिक बिदा दिने प्रचलन रहेको उल्लेख गर्दै सरकारले आइतबारको बिदा तत्काल हटाउने विषयमा कुनै योजना नबनाएको जानकारी दिए।

सरकारले गत चैत २२ गतेदेखि शनिबार र आइतबार गरी हप्तामा दुई दिन सार्वजनिक बिदा दिने व्यवस्था लागू गरेको थियो।