भारतसँग संवादमा संकोच गर्नु नेपालको हितमा हुँदैन: केशव पौडेल

काठमाण्डौ, ३० अषाढ़ । वरिष्ठ पत्रकार केशव पौडेलले वर्तमान सरकारले आफ्नो पहिलो १०० दिनमा परराष्ट्र नीतिको क्षेत्रमा अपेक्षित उपलब्धि हासिल गर्न नसकेको टिप्पणी गरेका छन्।

उनका अनुसार विशेषगरी नेपाल–भारत सम्बन्धमा आवश्यक स्तरको उच्च राजनीतिक तथा कूटनीतिक संलग्नता देखिन सकेको छैन। हालै नेपाली चियाको भारततर्फको निर्यातमा देखिएको अवरोधजस्ता घटनाले द्विपक्षीय सम्बन्धमा रहेका व्यावहारिक चुनौतीहरूलाई उजागर गरेको उनले बताए।

"नेपालको आर्थिक, व्यापारिक तथा रणनीतिक हित भारतसँग अत्यन्त गहिरोसँग जोडिएको छ। यस्तो अवस्थामा भारतबाट नेपाल भ्रमणमा आउने सरकारी प्रतिनिधि वा उच्च अधिकारीहरूसँग भेटघाट गर्न वा संवाद गर्न हिच्किचाउनु नेपालको राष्ट्रिय हितअनुकूल हुँदैन," पौडेलको भनाइ छ।

उनले कूटनीतिमा नियमित संवाद, विश्वास निर्माण र उच्चस्तरीय राजनीतिक सम्पर्कलाई प्राथमिकता दिनुपर्ने उल्लेख गर्दै नेपाल–भारत सम्बन्धलाई थप सक्रिय, परिणाममुखी र व्यावहारिक बनाउनु आवश्यक रहेको बताए। 

साथै, व्यापार, लगानी, पारवहन, ऊर्जा तथा सीमा व्यवस्थापनजस्ता साझा चासोका विषयमा दुवै देशबीच निरन्तर संवाद र समाधानमुखी पहल आवश्यक रहेको उनको धारणा छ।