प्रधानमन्त्रीको अभिव्यक्ति राष्ट्रघाती भन्दै श्रम संस्कृति पार्टी सडकमा

काठमाडौँ: श्रम संस्कृति पार्टीका महासचिव आरेन राईले प्रधानमन्त्रीको हालैको अभिव्यक्तिलाई राष्ट्रहितविपरीत र राष्ट्रघाती ठहर गर्दै त्यसको विरोधमा सडक आन्दोलन गर्नुपरेको बताएका छन्। 

माइतीघरमा आयोजित प्रदर्शनका क्रममा राईले सामाजिक सञ्जालमा कीर्ते प्रमाण प्रयोग गरेर प्रधानमन्त्रीको अभिव्यक्तिलाई ठहर्याउने प्रयास भइरहेको आरोप लगाए। सरकार र परराष्ट्र मन्त्रालयले दिएको स्पष्टीकरणलाई ढाकछोपको प्रयास भन्दै उनले आपत्ति जनाए।

सीमा समस्या र सीमा अतिक्रमण फरक विषय भएको उल्लेख गर्दै प्रधानमन्त्रीलाई संसद्मा बोलाएर स्पष्ट जवाफ दिन र आवश्यक परे क्षमायाचना गर्नुपर्ने माग गरे। प्रधानमन्त्रीको अभिव्यक्तिले दीर्घकालीन रूपमा राष्ट्रिय हितमा असर पार्न सक्ने भन्दै राष्ट्रवादी नागरिक र बौद्धिक वर्ग चिन्तित भएको उनको भनाइ छ।