संसदलाई उत्तरदायी र मर्यादित बनाउन बर्षामान पुनको सुझाव

काठमाडौं: नेकपाका सांसद वर्षमान पुनले संसदलाई अझ उत्तरदायी र मर्यादित बनाउन सभामुखलाई सुझाव दिएका छन् ।

आइतबारको प्रतिनिधिसभा बैठकमा बोल्दै पुनले नियम ५६ नयाँ व्यवस्था भएको बताउदै संसदलाई उत्तरदायी र मर्यादित बनाउन सभामुखले भूमिका खेल्नुपर्ने बताएका हुन् ।

उनले भने- '२०६४ मा पनि थिएन, ०७० मा पनि थिएन, ०७४ मा पनि थिएन । किन राखियो भन्दा सदनलाई जीवन्त बनाउने उद्देश्यले । मन्त्रीहरूसँग अन्तरक्रिया त भइरहन्थ्यो तर सभाको मुख्य नेता प्रधानमन्त्री नै हो । सरकार के गरिरहेको छ भन्ने विषयमा प्रत्यक्ष संवाद हुँदा सदन जीवन्त पनि हुन्छ र लोकतान्त्रिक पनि हुन्छ ।’

सांसद पुनले नियम कार्यान्वयनलाई सत्ता पक्ष वा प्रतिपक्षले इगोका रूपमा नलिन पनि आग्रह गरे । उनले सभामुखलाई कार्यव्यवस्था परामर्श समितिमा समीक्षा गर्न सुझाव दिँदै संसदलाई मर्यादित र नियमअनुसार अघि बढाउनुपर्ने बताए ।

उनले भने- 'प्रधानमन्त्री आउनुभयो, यो महिनाको नियमावली कार्यान्वयन भयो। संसद सफल भयो, अभ्यास पनि भयो। अब नियमावलीका व्यवस्थालाई नियमसंगत रूपमा नै अगाडि बढाऔं ।

सांसद पुनले संसद झगडा गर्ने ठाउँ नभएर आफ्ना असहमति राख्ने ठाउँ भएको भन्दै कसैप्रति व्यक्तिगत रिसिइबी नभएको बताए ।