संसदीय समितिमा अर्थमन्त्री वाग्लेलाई बोलाएर छलफल चलाउन माग

काठमाडौँ: राष्ट्रिय सभा अन्तर्गतको विकास, आर्थिक मामिला तथा सुशासन समितिको बैठकमा सांसदहरूले अर्थमन्त्री डा. स्वर्णिम वाग्लेलाई बोलाएर छलफल गर्न माग गरेका छन्।

 सोमबार समितिको वार्षिक कार्ययोजनामाथि भएको छलफलका क्रममा सांसदहरूले आगामी आर्थिक वर्षको बजेट र सरकारको आर्थिक नीतिबारे अर्थमन्त्रीसँग प्रत्यक्ष संवाद गर्नुपर्ने बताएका हुन्।

जेठ १५ गते बजेट ल्याउनुपर्ने संवैधानिक प्रावधानअनुसार संसद्मा 'प्रि-बजेट' छलफलको तयारी भइरहेका बेला सांसद घनश्याम रिजालले यस्तो माग राखेका हुन्। त्यस्तै, नेकपा एमालेकी सांसद रेखा कुमारी झाले नयाँ सरकार गठनमा मधेशको भूमिका महत्वपूर्ण रहेको उल्लेख गर्दै आगामी बजेटमा मधेशलाई न्यायोचित प्राथमिकता दिनुपर्नेमा जोड दिइन्।

सांसद सावित्री मल्लले पनि समान बजेट वितरणको विषयमा सरकारको योजना स्पष्ट हुनुपर्ने बताउँदै अर्थमन्त्रीसँगको छलफल आवश्यक रहेको उल्लेख गरिन्। उनले कर्णाली लगायत पछाडि पारिएका क्षेत्र र भूगोललाई लक्षित गरी सरकारले विशेष नीति तथा योजना ल्याउनुपर्ने माग समेत गरिन्।