प्रचण्ड र माधव नेपाललाई बिदा हुन युवा नेताहरूको दबाब, तेस्रो पुस्तालाई नेतृत्व सुम्पिन प्रस्ताव

काठमाडौं: नेपाली कम्युनिस्ट पार्टीका युवा नेताहरूले शीर्ष नेतृत्वलाई तत्काल पदबाट राजीनामा दिई तेस्रो पुस्तालाई नेतृत्व हस्तान्तरण गर्न आग्रह गरेका छन्। 

केन्द्रीय कार्यालय पेरिसडाँडामा आयोजित जनसंगठनका इन्चार्ज तथा पदाधिकारीहरूको बैठकमा सहभागी युवाहरूले संयोजक प्रचण्ड र सहसंयोजक माधवकुमार नेपाललाई अब 'अभिभावक'को भूमिकामा बस्न सुझाव दिएका हुन्।

बैठकमा बालेन शाह जस्ता उदाउँदा शक्तिहरूसँग प्रतिस्पर्धा गर्न अब पुरानो पुस्ताले नसक्ने भन्दै तेस्रो पुस्ता अघि सर्नुपर्ने धारणा राखिएको थियो। वाइसिएल अध्यक्ष पुष्प ओली र अखिल क्रान्तिकारीका उपाध्यक्ष बिराज थापालगायतले शीर्ष नेताहरूको ऐतिहासिक योगदानको सम्मान गर्दै नयाँ नेतृत्वका लागि बाटो प्रशस्त गर्न माग गरे।

सहभागीहरूले प्रचण्डलाई चौथो दलको संसदीय नेतामा सीमित नभई राष्ट्रिय अभिभावक बन्न सुझाव दिएका छन्। संसदीय दलको नेता, उपनेता र प्रमुख सचेतकमा सल्यानका रमेश मल्ल, रुकुम पश्चिमका गोपाल शर्मा वा सिन्धुपाल्चोकका युवराज दुलालमध्येबाट चयन गर्न प्रस्ताव गरिएको छ।

चुनावमा व्यहोरेको पराजयको जिम्मेवारी लिँदै नेतृत्वले मार्गप्रशस्त गर्नुपर्ने र पार्टीको भद्दा केन्द्रीय समितिलाई विघटन गरी छरितो बनाउनुपर्ने आवाज समेत बैठकमा उठेको छ। साथै, पार्टीमा बसेर अन्य दल (घण्टी) लाई मत दिनेहरूको पहिचान गरी कारबाही गर्न युवा नेताहरूले माग गरेका छन्।