धादिङ क्षेत्र नं. १ का कांग्रेस उम्मेदवार रिजालको प्रतिबद्धता पत्र सार्वजनिक

धादिङ: आगामी प्रतिनिधि सभा निर्वाचनका लागि धादिङ क्षेत्र नम्बर १ बाट नेपाली कांग्रेसका उम्मेदवार कृष्ण रिजालले आफ्नो चुनावी प्रतिबद्धता पत्र सार्वजनिक गरेका छन् । ‘बदल्यौ कांग्रेस, बदल्छौ देश’ भन्ने मूल नाराका साथ रिजालले धादिङको विकास र समृद्धिका लागि मार्गचित्र प्रस्तुत गरेका हुन् ।

रिजालले सार्वजनिक गरेको प्रतिबद्धता पत्रमा भौतिक पूर्वाधार, सूचना प्रविधि, कृषि र सुशासनलाई मुख्य प्राथमिकतामा राखिएको छ ।

राजमार्ग आर्थिक कोरिडोर र एकीकृत विकास
उम्मेदवार रिजालले धुनिबेसी नगरपालिकादेखि बेनिघाट रोराङ गाउँपालिकासम्मको क्षेत्रलाई ‘वातावरण अनुकूल औद्योगिक कोरिडोर’ का रूपमा विकास गर्ने योजना अघि सारेका छन् । मध्यपहाडी लोकमार्ग अन्तर्गत गल्छी र बैरेनीमा ‘स्मार्ट सिटी’ तथा ‘स्याटेलाइट सिटी’ विस्तार कार्यक्रमलाई शीघ्र सम्पन्न गर्ने उनको प्रतिबद्धता छ । साथै, राजमार्गमा हुने दुर्घटनालाई लक्षित गरी गजुरीमा सुविधासम्पन्न ‘ट्रमा सेन्टर’ स्थापना गर्ने योजना उनले अघि सारेका छन् ।

डिजिटल धादिङ र युवा स्वरोजगार
युवाहरूलाई वैदेशिक रोजगारीको विकल्पका रूपमा घरमै बसेर विश्व बजारमा काम गर्न योग्य बनाउन ‘डिजिटल धादिङ’ को अवधारणा ल्याइएको छ । यस अन्तर्गत उच्च गतिको इन्टरनेटसहितको ‘वर्किङ स्पेस’ र ‘आईटी हब’ निर्माण गरिने उल्लेख छ । विद्यालय तहदेखि नै सूचना प्रविधि र व्यावसायिक शिक्षा अनिवार्य गर्ने रिजालको योजना छ ।

कृषि र महिला सशक्तीकरण
धादिङको परम्परागत कृषिलाई व्यावसायिक लाभमा बदल्न ‘कोल्ड चेन’ र प्रशोधन केन्द्र निर्माण गर्ने प्रतिबद्धता पत्रमा उल्लेख छ । किसानका उत्पादनलाई उचित बजार मूल्य दिलाउन सार्वजनिक–निजी–सहकारी मोडेलमा लगानी भित्र्याइने बताइएको छ । महिलाहरूको आर्थिक स्वतन्त्रताका लागि स्थानीय बैंकहरूसँग समन्वय गरी ‘बिउँ पुँजी’ र उद्योग दर्तामा सहुलियत दिने कार्यक्रम रिजालले अघि सारेका छन् ।

जवाफदेहिता र नयाँ नेतृत्वको समर्थन
राजनीतिक सुधारका लागि रिजालले आफू निर्वाचित भएपछि कार्यकालको अन्त्यमा ‘प्रोजेक्ट क्लोजर रिपोर्ट’ लिएर जनताको अदालतमा जाने घोषणा गरेका छन् । उनले नेपाली कांग्रेसका केन्द्रीय महामन्त्री गगन थापालाई भावी कार्यकारी नेतृत्व (प्रधानमन्त्री) का रूपमा स्थापित गर्न आफ्नो विज्ञता र अनुभव प्रयोग गर्ने समेत बताएका छन् ।

नीतिगत सुधार र सुशासन
प्रतिवद्धता पत्रमा योग्यता प्रणाली, भ्रष्टाचारमुक्त समाज, र डिजिटल सुशासनमा जोड दिइएको छ । सिद्धलेक, तामाखानी सम्भाव्यता अध्ययन, महाभारत रेन्जमा पर्यटन विकास र चेपाङ संग्रहालय स्थापना जस्ता स्थानीय आवश्यकतालाई पनि प्राथमिकतामा राखिएको छ ।

आफ्नो निर्वाचन क्षेत्रका धुनिबेसी, थाक्रे, गल्छी, गजुरी, सिद्धलेक र बेनिघाट रोराङका जनतासँग मत माग्दै रिजालले यो अभियानलाई राष्ट्रिय गौरवसँग जोड्ने संकल्प व्यक्त गरेका छन् ।