पूर्वराजा ज्ञानेन्द्रको सन्देशलाई राप्रपाको समर्थन, 'नवीन समझदारी'का लागि सर्वपक्षीय सम्मेलनको माग

काठमाडौं, ७ फागुन: राष्ट्रिय प्रजातन्त्र पार्टी (राप्रपा) ले पूर्वराजा ज्ञानेन्द्र शाहले प्रजातन्त्र दिवसको पूर्वसन्ध्यामा जारी गरेको सन्देशलाई स्वागत र समर्थन गर्ने निर्णय गरेको छ ।

आइतबार धुम्बाराहीस्थित पार्टीको केन्द्रीय कार्यालयमा बसेको केन्द्रीय पदाधिकारी बैठकले पूर्वराजाको अभिव्यक्तिलाई 'मुलुकको धरातलीय यथार्थको प्रतिबिम्ब' भएको ठहर गरेको हो ।

पार्टीका अध्यक्ष राजेन्द्र लिङ्देन चुनावी अभियानको क्रममा उपत्यकाबाहिर रहेकाले वरिष्ठ उपाध्यक्ष बुद्धिमान तामाङको अध्यक्षतामा सो बैठक बसेको थियो । बैठकमा पूर्व अध्यक्षद्वय डा. प्रकाशचन्द्र लोहनी र कमल थापालगायत काठमाडौंमा उपलब्ध पदाधिकारीहरूको उपस्थिति रहेको थियो ।

बैठकपछि प्रवक्ता एवं प्रचार विभाग प्रमुख मोहन कुमार श्रेष्ठद्वारा जारी विज्ञप्तिमा भनिएको छ, "पहिले राष्ट्रिय समस्याको समाधान गरेर मात्र निर्वाचनमा जानु उचित हुने र निर्वाचनपछि हुन सक्ने द्वन्द्व तथा अशान्तिलाई रोक्न राष्ट्रिय सहमति कायम गर्नुपर्ने राजाको अभिव्यक्ति देश र जनताको हितमा छ ।" राप्रपाले राजाको सो सन्देश आम जनताको चाहनाअनुरूप भएको समेत दाबी गरेको छ ।

राप्रपाले मुलुकको वर्तमान संकटपूर्ण अवस्थालाई दृष्टिगत गर्दै सबै राजनीतिक विचार र शक्तिहरू अटाउने गरी 'नवीन समझदारी' कायम गर्नुपर्नेमा जोड दिएको छ । यसका लागि सर्वपक्षीय सम्मेलनको माग राख्दै आएको राप्रपाले प्रधानमन्त्रीलाई ज्ञापनपत्र बुझाइसकेको र अन्य दलहरूसँग पनि संवाद गरिरहेको जानकारी दिएको छ ।

विज्ञप्तिमा निर्वाचन अगावै राष्ट्रिय समस्या समाधानका लागि सरकार र अन्य राजनीतिक दलहरूलाई आग्रह गरिएको छ । साथै, राजाको सन्देश र पार्टीको नीति अनुसार 'नवीन समझदारी' का लागि दबाब सिर्जना गर्न र चुनावी अभियानमा उच्च मनोबलका साथ सहभागी हुन राप्रपाले आम जनता र कार्यकर्तालाई आह्वान गरेको छ ।

राप्रपाले वर्तमान राजनीतिक अन्योल अन्त्य गर्न राजासहितको सबै राजनीतिक शक्तिहरूको प्रतिनिधित्व हुने गरी नयाँ बाटो पहिल्याउनुपर्ने अडान पुनः दोहोर्याएको छ ।