राप्रपाको चुनावी संकल्प पत्र: 'कसैले नहार्ने देशले जित्ने' मूल मन्त्र

राष्ट्रिय प्रजातन्त्र पार्टी (राप्रपा) ले आगामी फागुन २१ गते हुने प्रतिनिधि सभा निर्वाचन २०८२ का लागि आफ्नो चुनावी 'संकल्प पत्र' सार्वजनिक गर्दै देशको वर्तमान समस्याको समाधानका लागि पूर्ण रूपान्तरणकारी खाका प्रस्तुत गरेको छ। 

'कसैले नहार्ने देशले जित्ने' मूल मन्त्रका साथ सार्वजनिक गरिएको यस संकल्प पत्रमा राप्रपाले हालको शासन प्रणाली असफल भएको दाबी गर्दै देशलाई एकीकरण गर्ने अभिभावकीय संस्थाको रूपमा राजसंस्था र सबै धर्मबीच समानता कायम हुने गरी 'वैदिक सनातन धर्म सापेक्ष हिन्दू राष्ट्र' को पुनःस्थापनालाई आफ्नो प्रमुख राजनीतिक आधार बनाएको छ। वर्तमान संघीयता खर्चिलो र भद्दा भएको भन्दै राप्रपाले प्रदेश तहको खारेजी गरी केन्द्र र बलियो स्थानीय तह भएको दुई तहको शासकीय संरचनाको नयाँ प्रस्ताव अघि सारेको छ।

शासकीय सुधार र भ्रष्टाचार नियन्त्रणलाई प्राथमिकतामा राख्दै राप्रपाले वि.सं. २०४६ पछिका सबै उच्चपदस्थ नेता र कर्मचारीहरूको सम्पत्ति छानबिन गरी अवैध रूपमा आर्जन गरिएको सम्पत्ति जफत गर्ने कठोर नीति अघि सारेको छ। "बरु नष्ट हुन्छौँ, भ्रष्ट हुँदैनौँ" भन्ने संकल्पका साथ पार्टीले भ्रष्टाचारमा शून्य सहनशीलता अपनाउने र भ्रष्टाचार सम्बन्धी सूचना दिनेलाई संरक्षण गर्ने कानुन निर्माण गर्ने प्रतिवद्धता व्यक्त गरेको छ। यसका साथै, राष्ट्रिय सुरक्षाको अन्तिम किल्लाको रूपमा रहेको नेपाली सेनाको गौरवलाई अक्षुण्ण राख्दै नेपाल प्रहरी, सशस्त्र प्रहरी र राष्ट्रिय अनुसन्धान विभागलाई राजनीतिक हस्तक्षेपमुक्त बनाई व्यावसायिक र सबल बनाउने योजना पार्टीले अघि सारेको छ।

आर्थिक विकासका लागि राप्रपाले 'आर्थिक सुधार ३.०' को अवधारणा प्रस्तुत गर्दै आगामी १० वर्षलाई 'ऊर्जा उत्पादन दशक' घोषणा गर्ने र २८,५०० मेगावाट विद्युत उत्पादनको लक्ष्य राखेको छ। जसमा विपन्न परिवारलाई विद्युत निःशुल्क दिने र खाना पकाउने बिजुली लागत मूल्यमै उपलब्ध गराउने उल्लेख छ। कृषि क्षेत्रमा आमूल परिवर्तनका लागि प्रत्येक पालिकामा मल कारखाना र शीतभण्डार स्थापना गर्ने, कृषि अनुदान सिधै किसानको हातमा पुर्‍याउने र कृषिलाई सम्मानित पेशाको रूपमा विकास गर्ने प्रतिवद्धता जनाइएको छ। निजी क्षेत्रलाई अर्थतन्त्रको इन्जिन मान्दै राप्रपाले उद्योगधन्दामा हुने हडताल र बन्दलाई पूर्ण रूपमा निषेध गर्ने र स्वदेशी उत्पादनलाई प्रोत्साहन गर्न 'नेपाल मार्ट' जस्ता संयन्त्रहरू स्थापना गर्ने लक्ष्य राखेको छ।

सामाजिक क्षेत्रमा 'कल्याणकारी राज्य'को अवधारणा बोकेको राप्रपाले कक्षा १२ सम्म सरकारी विद्यालयमा पूर्ण रूपमा निःशुल्क शिक्षा प्रदान गर्ने र विद्यालयमा हुने दलीय राजनीतिको अन्त्य गरी 'शिक्षक मात्र'को अवधारणा लागू गर्ने बताएको छ। स्वास्थ्य क्षेत्रमा सबै नागरिकका लागि आधारभूत स्वास्थ्य सेवा र अनिवार्य स्वास्थ्य बीमाको व्यवस्था गर्ने तथा क्यान्सर, मिर्गौला र मेरुदण्ड रोगबाट पीडित नागरिकलाई निःशुल्क उपचार र आर्थिक सहायता दिने घोषणा गरेको छ। यस्तै, 'कमाउँदै पढ्दै' योजना मार्फत युवाहरूलाई स्वदेशमै रोजगारीको अवसर सिर्जना गर्ने र सूचना प्रविधि (IT) तथा आर्टिफिसियल इन्टेलिजेन्स (AI) लाई राष्ट्रिय प्राथमिकताको उद्योगको रूपमा विकास गर्ने संकल्प पत्रमा उल्लेख छ।

परराष्ट्र नीतिका सम्बन्धमा राप्रपाले 'नेपाल प्रथम, नेपाली प्रथम' को सिद्धान्तलाई आत्मसात गर्दै असंलग्न परराष्ट्र नीति र पञ्चशीलको सिद्धान्तका आधारमा छिमेकी तथा मित्र राष्ट्रहरूसँगको सम्बन्धलाई सुदृढ बनाउने जनाएको छ। गैर-आवासीय नेपालीहरूका लागि 'एक पटकको नेपाली, सधैँको नेपाली' भन्ने मान्यताका साथ वंशजको नागरिकताको निरन्तरता सुनिश्चित गर्ने र वैदेशिक रोजगारीमा रहेका नेपालीहरूको मताधिकारको रक्षा गर्ने प्रतिवद्धता व्यक्त गरेको छ। 'नेपाल बन्द' जस्ता कार्यक्रम कहिल्यै नगर्ने घोषणा गर्दै राप्रपाले आफ्नो चुनावी चिह्न 'हलो' मा मतदान गरी देशको सार्वभौमिकता र अखण्डता जोगाउन तथा समृद्ध नेपाल निर्माणको अभियानमा सहभागी हुन आम मतदातालाई हार्दिक आह्वान गरेको छ।