जसपा नेपालमा फर्किइन् नाउपा केन्द्रीय सदस्य चौधरी

सप्तरी : जनता समाजवादी पार्टी नेपालले करिब चार महिना अघिदेखि सुरु गरेको 'घर फिर्ती अभियान' प्रभावकारी बनाएको छ ।

यसैक्रममा, मंगलबार नागरिक उन्मुक्ति पार्टीका केन्द्रीय सदस्य दिलकुमारी चौधरीसहितका नेता तथा कार्यकर्ताहरु जसपा नेपालमा प्रवेश गरेका छन् ।

सप्तरी-३ मा चुनावी छलफल र भेटघाटलाई तीव्रता दिइरहेका जसपा नेपालक़ा अध्यक्ष उपेन्द्र यादवले चौधरीसहितक़ा नेताहरुलाई पार्टीमा स्वागत गरेका छन् ।

यसअघि उनी जसपा नेपालकी केन्द्रीय सदस्यको जिम्मेवारीमा थिइन् । जसपा नेपाल विभाजन हुँदा उनी पार्टी परित्याग गरि नागरिक उन्मुक्ति पार्टी प्रवेश गरेकी थिइन् । उनी थारु कल्याणकारी सभाकी केन्द्रीय सदस्य एवम् नेपाल आदिवासी जनजाति महासंघकी मधेश प्रदेशकी उपाध्यक्ष समेत हुन् ।

यसैगरी, कलाकारिता क्षेत्रमा सक्रिय रहँदै आएका थारु नेता गोपाल प्रसाद चौधरी समेत सोमबार पार्टी प्रवेश गरेका थिए । युवा नेता शिवशंकर यादव ‘शिवम’ समेत जसपा नेपाल प्रवेशसँग जोडिएका छन् । पार्टी विभाजन हुँदा उनी अशोक राई नेतृत्वको जसपामा लागेका थिए ।

मधेश आन्दोलनमा सक्रिय भूमिका निर्वाह गरेका उनको प्रवेशले यूवा सङ्गठनमा थप उर्जा मिल्ने जसपा नेपालक़ा केन्द्रीय सचिव शैलेन्द्र साहले बताए ।