संगठन बलियो बनाउन मधेश झरे: गगन थापा

नेपाली कांग्रेसका महामन्त्री गगन थापाले पार्टी संगठनलाई बलियो बनाउन आफू काठमाडौं छाडेर मधेस झरेको बताएका छन्। सर्लाही-४ मा आयोजित युवाहरूसँगको छलफलमा थापाले काठमाडौं-४ मा आफ्नो जित सुनिश्चित भए पनि मधेसको मुद्दालाई केन्द्रमा राख्न आफूले यो निर्णय लिएको दाबी गरे।

उनले काठमाडौंमा आफ्नो प्रतिस्पर्धी नै नभएको जिकिर गर्दै भने, "म काठमाडौं नलड्ने पक्का नहुँदासम्म अन्य दलले उम्मेदवार समेत पाउन सकेका थिएनन्।" आफू मधेस झरेपछि काठमाडौंका मतदाता स्तब्ध भएको स्वीकार्दै उनले थपे, "काठमाडौंका मतदातालाई बुझाउन गाह्रो भए पनि मधेसको साथबिना कांग्रेस ठूलो पार्टी बन्न सक्दैन भन्ने मेरो बुझाइ हो। त्यसैले अघिल्लो पटककै इच्छा अहिले पूरा गरेको हुँ।"