निजी क्षेत्रलाई हेर्ने हाम्रो दृष्टिकोण बदल्न आवश्यक छः प्रचण्ड

नेपाल उद्योग वाणिज्य महासंघद्वारा आयोजित एक विशेष सम्वाद कार्यक्रममा बोल्दै नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले निजी क्षेत्रलाई हेर्ने राज्यको दृष्टिकोण र सोचमा आमूल परिवर्तन ल्याउनु पर्नेमा जोड दिएका छन्। उनले निजी क्षेत्रलाई उचित प्रोत्साहन र संरक्षण नगरेसम्म आर्थिक विकास र समृद्धिको नारा केवल कुरामा मात्र सीमित हुने बताए।

उनले भने, “हाम्रो राज्य संरचना र कर्मचारीतन्त्रको सोचमा निजी क्षेत्रप्रति हेर्ने दृष्टिकोणमा अझै पनि केही कमीहरू छन्, जसलाई समयमै सच्याउन आवश्यक छ।” संविधानमा सार्वजनिक, निजी र सहकारी क्षेत्रलाई समेटेर अगाडि बढ्ने लक्ष्य राखिए पनि व्यवहारमा त्यसको प्रभावकारी कार्यान्वयन हुन नसकेको उनले स्वीकार गरे।

प्रचण्डले ‘जेनजी’ आन्दोलनले राजनीतिक नेतृत्वलाई आत्मसमीक्षा गर्न र कमजोरीहरू सुधार्न ठूलो दबाब दिएको उल्लेख गरे। मुलुक अहिले असाधारण र जटिल परिस्थितिबाट गुज्रिरहेको बताउँदै उनले राष्ट्रिय सहमतिको माध्यमबाट मात्र वर्तमान संकटको समाधान खोजिनुपर्ने धारणा राखे।

निर्वाचनलाई नै देशको निकासको मुख्य माध्यम ठहर्‍याउँदै उनले आगामी निर्वाचनले नयाँ जनादेश दिने र संविधानमा देखिएका सीमाहरूलाई संशोधनमार्फत परिमार्जन गर्न सहयोग पुग्ने विश्वास व्यक्त गरे। शान्ति, स्थायित्व र समृद्धिका लागि सरकार, निजी क्षेत्र र नागरिक समाज सबै एकै ठाउँमा उभिनुको विकल्प नरहेको उनको भनाइ थियो।