एमाले नेतृत्वलाई छोए देश ठप्प पारिन्छ: अध्यक्ष केपी शर्मा ओली

काठमाडौँ: नेकपा (एमाले) का अध्यक्ष केपी शर्मा ओलीले पार्टी नेतृत्वमाथि कुनै पनि प्रकारको राजनीतिक वा भौतिक प्रहार भए देश ठप्प पार्ने चेतावनी दिएका छन्।

नेकपा एमालेको सम्पन्न माहाधिवेशन कार्यक्रमलाई सम्बोधन गर्दै अध्यक्ष ओलीले वर्तमान सरकारले एमालेविरुद्ध विभिन्न षडयन्त्र बुनिरहेको आरोप लगाएका छन्। उनले सरकारले 'मिडिया ट्रायल' र पञ्चायतकालीन शैलीमा जाली मुद्दाहरू लगाएर पार्टीलाई कमजोर बनाउन खोजेको दाबी समेत गरे।

ओलीले कार्यकर्ताहरूलाई निर्देशन दिँदै भने, "म तपाईंहरूलाई भन्न चाहन्छु, एमाले नेतृत्वमाथि छोएको दिन देश ठप्प हुनुपर्दछ। यो सरकार ढल्नुपर्दछ र ढल्नेछ।" उनले अब केवल सडकमा 'चक्का जाम' मात्र गरेर नपुग्ने भन्दै नेतृत्वमाथि प्रहार भए सबै क्षेत्र ठप्प पार्नुपर्ने जिकिर गरेका छन्।

अध्यक्ष ओलीले पार्टी कार्यकर्ताहरूलाई जुनसुकै परिस्थितिमा पनि 'तयारी हालत' मा बस्न आह्वान गरेका छन्। "एमालेलाई छोयो भने संसारमा के-के न गर्छौं भन्नेहरूलाई कामले नै जवाफ दिनुपर्छ," उनले थपे, "जो जहाँ छ, त्यहीँबाट सबै कुरा बन्द गरिदिनुस्, देश ठप्प पारिदिनुस्।"

पछिल्लो समय एमाले नेतृत्वमाथि विभिन्न कोणबाट आक्रमण भइरहेको संकेत गर्दै ओलीले अब कुराले मात्र नभई कामले नै प्रतिरोध गर्ने चेतावनी दिएका हुन्।