विवेकशील साझा पार्टीसँग एकता गर्ने रास्वपाको निर्णय

काठमाण्डौ, १३ मङ्सिर । राष्ट्रिय स्वतन्त्र पार्टी (रास्वपा) ले  विवेकशील साझा पार्टीसँग एकता गर्ने निर्णय गरेको छ ।

गएराती बसेको केन्द्रीय समितिको भर्चुअल बैठकले विवेकशील साझा पार्टीले राष्ट्रिय स्वतन्त्र पार्टीसँग एकीकरण गर्ने सर्वसम्मत प्रस्तावको रास्वपा केन्द्रीय समितिले सहर्ष स्वागत गर्दै आगामी मङ्सिर १४ गते आइतबार राष्ट्रिय सभागृहमा 'एकता घोषणासभा' आयोजना गर्ने निर्णय गरेको प्रवक्ता मनिष झाले जानकारी दिएका छन् ।

त्यस्तै बैठकले असल शासन र समुन्नतिसँग सरोकार राख्ने सबै सुसंस्कृत एवं परिवर्तनकामी राजनीतिक शक्तिहरुसँग मुद्दागत र सांगठनिक सहकार्यका पृथक विधिहरु अवलम्बन गर्दै संवाद प्रकृयालाई घनिभूत बनाउन राष्ट्रिय स्वतन्त्र पार्टीको 'उच्च संवाद समिति' लाई केन्द्रीय समितिले दिएको निर्देशन अनुरुप पार्टी सचिवालयले गठन गरेको संयन्त्र- सङ्घीय नेतृत्व मञ्च अनुमोदित गरेको झाले जानकारी दिए ।