एमालेको विधान अधिवेशन आज सकिदै

काठमाडौं: शुक्रबारदेखि शुरु भएको नेकपा एमालेको दोस्रो विधान महाधिवेशन आज सकिदैछ । 
 

दोस्रो दिन तीन दस्तावेज प्रस्तुत भएपछि अहिले समुहगत छलफल भएको थियो । प्रतिनिधिलाई छलफलका लागि प्रदेश, उपत्यका र केन्द्रीय संरचनाको आधारमा १० समूहमा बाडेर छलफल गरिएको थियो । 
 

महाधिवेशनमा प्रस्तुत प्रतिवेदनहरूमाथि समुहगत रुपमा प्रतिनिधिहरुले आफ्नो धारणा राख्ने क्रममा प्रतिनिधिहरुलाई महाधिवेशनमा प्रस्तुत गरिएका दस्तावेजमा मात्र छलफल गर्न निर्देशन दिइएको भएपनि प्रतिनिधिहरुले विद्या भण्डारीको सदस्यताको विषय पनि उठाएका थिए । 
 

उद्घाटन सम्बोधनका क्रममा प्रधानमन्त्रीसमेत रहेका अध्यक्ष केपी शर्मा ओलीले महाधिवेसनमा प्रस्तुत भएका विषय बाहेक अन्य विषय छलफल नहुने स्पष्ट गर्दै भण्डारीको सदस्यता विषय छलफल नहुने संकेत गरेका थिए । तर प्रतिनिधिहरुले अध्यक्ष ओलीको निर्देशनलाई अवज्ञा गर्दै भण्डारीको सदस्यताको विषयमा कुरा उठाएक थिए ।
 

महाधिवेशनमा आज समूहका नेताले प्रतिवेदन प्रस्तुत गर्ने तालिका रहेको छ । समूहगत रूपमा प्रतिवेदनमाथि आएका सुझावलाई अध्यक्ष ओलीले जवाफ दिने र कुनै विषयमा सहमति हुन नसकेमा मतदानबाट टुंगो लगाउने तयारी गरिएको एमाले प्रचार विभाग प्रमुख राजेन्द्र गौतमले जानकारी दिएका छन् । आज महाधिवेशन सक्नु अघि एमालेको केन्द्रीय निर्वाचन आयोगको निर्वाचन समेत गर्ने तालिका रहेको छ ।