सरकार संवेदनशिल बनेन्, प्रधानमन्त्री भागेर हिंडे :सांसद पराजुली

काठमाडौं  :  राष्ट्रिय स्वतन्त्र पार्टी (रास्वपा) का सांसद गणेश पराजुलीले राज्य सम्वेदनशिल बन्नुपर्ने समयमा रमिता हेरेर बसिरहेको बताएका छन् ।

आइतबार संसद भवन बाहिर सञ्चारकर्मीहरुसँग कुरा गर्दै सांसद पराजुलीले विगत चार–पाँच दिनदेखि सदन अवरुद्ध गरेर प्रधानमन्त्री जवाफ दिन डराइरहेको बताएका हुन् ।

उनले भने, ‘यतिखेर राज्य कति संवेदनशील बन्नुपर्ने हो तर सरकारले साच्चिकै अचम्म बनाएको छ । विगत चार–पाँच दिनदेखि सदन अवरुद्ध छ । सुशासनसँग जोडिएका मुद्दा र विशेषगरी सरकार आफ्नालाई र विचौलियालाई पोस्ने काम गरिरहेको छ । राम्रा भनिएकाहरुलाई बर्खास्ती गर्ने र अध्याँरोबाट आमजनतालाई उज्यालोको सपना देखाउनेहरुलाई पनि हटाउने काम गर्दैगर्दा सदनबाट जवाफ मागिएको थियो । तर अहिले फेरी अर्को घटनाले देशमा जटिल अवस्था आएको छ । यसको  जटिल अवस्थामा पनि प्रधानमन्त्रीज्यु सदनप्रति जवाफदेही हुनुपर्नेमा बाहिर बाहिर हिडिरहनु भएको छ ।’

साथै उनले शुक्रबार राजावादी आन्दोलनमा मृत्यु भएका दुई जनाको जिम्मेवार को हो भन्दै प्रश्न गरे । उनले के कारणले  दुई जनाको ज्यान गुमाउनुपर्यो भनेर सरकारले जवाफ दिनुपर्छ की पर्दैन भन्दै प्रश्न गरे ।