पूर्वराजा पोखराबाट काठमाडौँ आउँदै, भव्य स्वागत गरिने

काठमाडौँ: पूर्वराजा आज पोखराबाट काठमाडौँ आउने अवसर पारेर  राजसंस्था पक्षधरहरूले भव्य स्वागत गर्ने भएका छन्।  

आज दिउसो ३ बजे शाह विमानस्थलमा अवतरण गर्ने कार्यक्रम रहेको छ। आज राजसंस्था पक्षधरहरू विमानस्थल देखि पुर्वराजाको निवाससम्म जाने तयारी रहेको छ ।

आजको कार्यक्रमलाई राजसंस्था पक्षधरहरूको शक्ति प्रदशनीको रुपमा पनि हेरिने भएको छ । पछिल्लो केही समयदेखि पोखरामा बसेर गण्डकी प्रदेशका विभिन्न जिल्लाको भ्रमण गरिरहेका पूर्वराजा ज्ञानेन्द्र शाह आज दिउँसो काठमाडौँ आउन लागेका हुन् । यसै अवसरमा राजावादी दलहरू राप्रपा, राप्रपा नेपालसहित राजा फर्काउने अभियान चलाइरहेका दुर्गा प्रसाईले काठमाडौँमा संयुक्त रुपमा शक्ति प्रदर्शन गर्न लागेका छन् ।

फागुन ७ गते प्रजातन्त्र दिवसको पुर्व सन्ध्यामा पूर्वराजा ज्ञानेन्द्रले भिडियो सन्देश जारी गर्दै देश संकटमा परेकोले राष्ट्र बचाउन आफूलाई साथ दिन अपिल गरेपछि  राजसंस्था पक्षधरहरू उत्साहित हुँदै आफ्नो अभियानलाई तीव्र बनाइरहेका छन् ।

पूर्वराजाको अपीलले राजसंस्था पक्षधरहरू हौसिएपछि सत्तारुढ र प्रतिपक्ष दलहरू पनि तरंगित हुँदै पूर्वराजालाई चेतावनी दिइरहेका छन् । प्रधानमन्त्री केपी शर्मा ओलीदेखि प्रतिपक्षी दलका नेता पुष्पकमल दाहाल प्रचण्डले पूर्व राजालाई राजनीति गर्ने भए दल खोलेर चुनाव लड्न चेतावनी दिएका छन् ।