श्रम, रोजगार तथा सामाजिक सुरक्षा मन्त्री भण्डारी र नेपालका लागि जापानी राजदुत तोरूबीच भेटवार्ता

काठमाडौं : श्रम, रोजगार तथा सामाजिक सुरक्षा मन्त्री शरत सिंह भण्डारीसँग नेपालका लागि जापानी राजदुत मइडा तोरूले मंगलवार शिष्टचार भेट गरेका छन्। 

भेटका क्रममा नेपाल र जापानबीच भएको आपसी समझदारी एवम् श्रम संझौताको कार्यान्वयनका विविध पक्षमा छलफल भएको थियो। 

साथै, नेपालबाट जापान पुगी कार्यरत रहेका नेपाली कामदारहरुको सेवा, सुविधा र सुरक्षा लगायतका विषयमा  मन्त्रीले चासो समेत राखेका थिए । 

यसै गरी जापान सरकारको माग बमोजिम पठाइने दक्ष सीपयुक्त कामदारको सन्दर्भमा दुवै पक्षबीच छलफल गरी यथाशिघ्र निश्कर्षमा पुर्याउनु पर्ने विषयमा समेत दुबै पक्षबीच कुरा भयो।

भेटका क्रममा नेपालका लागि जापानी राजदुतले नेपाली दक्ष कामदार जापान पठाउने विषय, कामदारका सेवा, सुविधा र सुरक्षाका विषयमा आफू सकारात्मक रहेको बताए । 

नेपाली कामदारका लागि जापान सुरक्षित र आकर्षक गन्तव्य रहेको साथै आगामी दिनमा नेपाली कामदार जापान पठाउने सन्दर्भमा दुवै पक्षले समझदारीका आधारमा सहकार्यलाई निरन्तरता दिने विषयमा समेत छलफल भएको प्रवक्ता डण्डुराज घिमिरे जानकारी दिए ।