बाढीपीडितका लागि तुंदी कन्स्ट्रक्सनको १ करोड ५२ लाख सहयोग

काठमाडौं: रसुवा, नुवाकोट र धादिङका बाढी प्रभावित नागरिकको राहत तथा उद्धारका लागि तुंदी कन्स्ट्रक्सन प्रालिले १ करोड ५२ लाख रुपैयाँ आर्थिक सहयोग गरेको छ।

कम्पनीका संस्थापक अध्यक्ष ऋषि प्रसाद सुवेदीले अर्थमन्त्री डा. स्वर्णिम वाग्लेलाई उक्त रकम बराबरको चेक हस्तान्तरण गरेका हुन्। सहयोग रकम प्रधानमन्त्री दैवी प्रकोप उद्धार कोषमार्फत बाढी तथा विपद् प्रभावितको राहत र उद्धारमा प्रयोग गरिनेछ।

रसुवा तथा आसपासका क्षेत्रमा आएको विनाशकारी बाढीबाट तुन्दी कन्स्ट्रक्सन स्वयं पनि ठूलो क्षतिमा परेको छ। कम्पनीका ९ जना कर्मचारी अझै सम्पर्कविहीन छन् भने क्रसर प्लान्ट, ब्याचिङ प्लान्ट, एक्साभेटर, टिपरलगायत निर्माण उपकरण तथा सामग्रीमा समेत बाढीले ठूलो क्षति पुर्‍याएको कम्पनीले जनाएको छ।

आफैं ठूलो क्षति व्यहोरेको अवस्थामा पनि कम्पनीले प्रभावित समुदायको उद्धार तथा पुनःस्थापनामा आफ्ना स्रोतसाधन परिचालन गरिरहेको छ। कम्पनीले जनशक्ति, हेभी इक्विपमेन्ट र दक्ष अपरेटर परिचालन गरी अवरुद्ध सडक खुलाउने, पहिरो तथा बाढीले थुपारेको माटो–ढुंगा हटाउने र आपतकालीन सडक पुनःस्थापनाका काममा सहयोग गर्दै आएको छ।

त्रिशूली–३ ए क्षेत्रमा दक्ष अपरेटरसहितको एक्साभेटर केही दिनदेखि निरन्तर परिचालन गरिएको कम्पनीले जनाएको छ। उक्त टोलीले बाढी तथा पहिरोका कारण अवरुद्ध पहुँच मार्ग खुलाउने र आपतकालीन सडक पुनःस्थापनामा काम गरिरहेको छ।

त्यस्तै, नुवाकोटको ठूलो खोला क्षेत्रमा बाढीबाट प्रभावित सडक खुलाउन ट्रेलरमार्फत एक्साभेटर पुर्‍याएर अनुभवी अपरेटर परिचालन गरिएको छ। यसबाट स्थानीय समुदायको आवागमन सहज बनाउन तथा अत्यावश्यक पहुँच मार्ग शीघ्र सञ्चालनमा ल्याउन सहयोग पुग्ने कम्पनीको भनाइ छ।

कम्पनीले आफूले व्यहोरेको क्षतिका बाबजुद प्रभावित समुदायको उद्धार, राहत र पूर्वाधार पुनःस्थापनालाई सामाजिक उत्तरदायित्वका रूपमा अघि बढाएको जनाएको छ।

‘आफू पीडामा हुँदा पनि राष्ट्र र समुदायको साथमा’ भन्ने भावनासहित तुन्दी कन्स्ट्रक्सनले संकटको समयमा आफ्नो स्रोतसाधन, प्राविधिक क्षमता र जनशक्ति परिचालन गरी प्रभावित समुदायको साथमा उभिएको जनाएको छ।