चीनतर्फको केरुङ सडक खुल्यो, उद्धार कार्य तीव्र

भोटेकोसी बाढीले क्षति पुर्‍याएको टिमुरे–केरुङ नाकासम्मको सडक चीनले पुनः सञ्चालनमा ल्याएको छ।

रातदिन निरन्तर काम गरेर बाढीले बगाएको सडक मर्मत गरी सञ्चालनमा ल्याइएको चिनियाँ सञ्चारमाध्यम सिन्ह्वाले जनाएको छ। भदौ १० गते भोटेकोसीमा आएको बाढीले नेपालको टिमुरे सीमा नाका र चीनतर्फको केरुङ पोर्ट जोड्ने सडकमा ठूलो क्षति पुर्‍याएको थियो।

नेपालतर्फबाट अझै टिमुरे नाकासम्म पुग्न सक्ने अवस्था नरहे पनि चीनले आफ्नोतर्फ बाढीले क्षति पुर्‍याएको सडक पुनः सञ्चालनमा ल्याएको हो। सडक सञ्चालनमा आएसँगै चिनियाँ उद्धार टोली केरुङ पोर्ट क्षेत्रमा पुगेको छ।

सिन्ह्वाका अनुसार बुधबार बिहान करिब ८ बजेदेखि सडकमा आवागमन पुनः सुरु भएको हो। सडक सञ्चालनमा आएपछि उद्धार टोली, राहत सामग्री तथा आवश्यक उद्धार उपकरण मुख्य उद्धार क्षेत्रमा पुर्‍याउन थालिएको सिन्ह्वाले जनाएको छ।