चीनले तेस्रो चरणको राहत सामग्री पठाउदै

काठमाडौं: चीन सरकारले नेपालका आवश्यकताअनुसार चीनले तेस्रो चरणको राहत सामग्री पठाउने तयारीसमेत गरेको छ ।

चिनियाँ विदेश मन्त्रालयका प्रवक्ता गुओ जियाकुनले तेस्रो चरणको राहत सामग्री पठाउने तयारी गरेको जानकारी दिएका हुन् । चिनियाँ विदेश मन्त्रालयको नियमित पत्रकार सम्मेलनका क्रममा प्रवक्ता जियाकुनले तेस्रो चरणमा बेलिब्रिज, शव राख्ने बाकस, रोग नियन्त्रणसम्बन्धी सामग्री र आपत्कालीन सञ्चार उपकरणलगायत सामग्री पठाइने बताएका छन् । साथै डिएनए पहिचान विज्ञको अर्को टोलीसमेत नेपाल पठाउने तयारी भइरहेको उनले जानकारी दिए ।

यसअघि चीनले नेपाललाई उपलब्ध गराएको दोस्रो चरणको आपत्कालीन राहत सामग्री मंगलबार दिउँसो काठमाडौं आइपुगेको थियो । जसमा बेपत्ता नागरिकको पहिचानमा सहयोग गर्न पाँच जना डिएनए पहिचान विज्ञसमेत नेपाल आएका छन् ।

चीनले विपद्मा बेपत्ता विदेशी नागरिकको खोजी तथा अन्य विषयमा सम्बन्धित देशका दूतावाससँग निरन्तर समन्वय गरिरहेको जनाएको छ । प्रभावित क्षेत्रमा अलपत्र परेका सीमावर्ती बासिन्दा तथा विदेशी नागरिकलाई स्थल र हवाई मार्गबाट व्यवस्थित रूपमा सुरक्षित स्थानतर्फ पठाउने काम भइरहेको छ ।

नेपालस्थित चिनियाँ दूतावासले आवश्यकतामा रहेका चिनियाँ नागरिकलाई निरन्तर सहयोग उपलब्ध गराउने जनाएको छ ।