‘विशेष महाधिवेशनको वैधानिकता पुष्टि भइसकेको छ, अदालतमा शानका साथ प्रतिरक्षा गर्छौं’

काठमाडौं: नेपाली कांग्रेसका सभापति गगन थापाले आफ्नो नेतृत्वमा सम्पन्न विशेष महाधिवेशन पूर्ण रूपमा विधानसम्मत रहेको दोहोर्‍याएका छन्। विशेष महाधिवेशनको वैधानिकता अदालतसमक्ष पुनः पुष्टि गर्न आफूहरू तयार रहेको उनले बताएका छन्।

आज पार्टी निकट आदिवासी जनजाति महासंघको कार्यक्रममा बोल्दै थापाले आगामी २४ गते बस्ने पार्टी केन्द्रीय समितिको बैठकमा अदालतको आदेशबारे विस्तृत छलफल गरी पार्टीको आधिकारिक धारणा तय गरिने बताए। यस विषयमा हतार गरेर निर्णय गर्नुपर्ने अवस्था नरहेको उनको भनाइ थियो।

थापाले भने, ‘पार्टी विधानले दिएको अधिकार प्रयोग गर्दै सार्वभौम सदस्यहरूले विशेष महाधिवेशन गरेका हुन्। त्यो महाधिवेशन आवश्यक पनि थियो र गर्न पाउने अधिकार पनि थियो। यसको वैधानिकता महाधिवेशनबाटै पुष्टि भइसकेको छ। त्यसपछि निर्वाचन आयोग र सर्वोच्च अदालतको इजलासले समेत त्यसलाई वैध ठहर गरिसकेको छ। अहिले फेरि वैधानिकता पुष्टि गर्नुपर्ने भन्दै अदालतले दिएको अवसरलाई हामी विशेष महाधिवेशनको वैधता पुनः स्थापित गर्ने अवसरका रूपमा लिएका छौँ। हामी अदालतको प्रक्रियामा सम्मानपूर्वक सहभागी हुनेछौँ र आफ्नो पक्षको प्रतिरक्षा गर्नेछौँ।’